О́skemendegi keń dańǵyldyń boıynan ashylǵan vızıt ortalyq týrıster men óńir turǵyndaryna oblystyń tabıǵı, mádenı jáne tarıhı kórikti jerleri, sondaı-aq týrıstik marshrýttar men qyzmetter týraly tolyq aqparat berýge arnalǵan. Ishinde kádesyılarǵa deıin satylady. Altaıǵa aıaǵy tıip, tarıhymen, tabıǵatymen tereńirek tanysqysy keletin týrıster aldymen atalǵan vızıt ortalyqqa at basyn burǵandary abzal.
Saltanatty is-shara bastalmas buryn Týrıstik aqparattyq ortalyqtyń aýlasynda saıahatshylarǵa arnalǵan kórme uıymdastyryldy. Biri baly men shaıyn usynsa, endi biri raftıngke arnalǵan qaıyq túrlerin kórsetti. Altaıda kezdesetin túrli tastardan jasalǵan kádesyılar da búgingi kórmeden tabyldy.
– Bul aqparattyq ortalyqtyń óńirdegi týrızmdi damytýǵa qosar úlesi zor. Endigi kezekte bizdiń óńirge keletin sheteldik jáne qazaqstandyq kez kelgen týrıst osy ortalyqtan tolyqqandy aqparat alatyn bolady. Qaıda, qalaı, qaı baǵytpen, qansha ýaqytta barýǵa bolatynyn jáne qaı jerde demalys oryndary, emdeý ortalyqtary bar ekeni týraly aqparatty osy ortalyq berip otyrady. Oblys aýmaǵyndaǵy barlyq saıahat oryndary, týrıstik fırmalar týraly aqparat osynda shoǵyrlanǵan, – dedi Shyǵys Qazaqstan oblysy ákiminiń orynbasary Darhan Sapanov.
Budan bólek, óńirdegi týrıstik ortalyqtar men saıahat oryndary týraly aqparat paraqtary áýejaıda jáne vokzaldarda da bolady. Osylaısha, oblysta týrızmdi damytýǵa naqty qadam jasalyp jatyr.
– Biz oblys ortalyǵyna at basyn tiregen kez kelgen týrıstke qyzmet kórsetetin bolamyz. Qajet bolsa, 24 saǵat qyzmet etýge daıynbyz. Bul týrıstik ortalyqta óńirdegi barlyq saıahat oryndary men demalys oryndary týraly aqparat bar. Eń qyzyǵy, munda Altaıdyń brendtik ónimderi, qolóner buıymdary saýdalanatyn bolady, – deıdi oblystyq týrıstik aqparattyq ortalyǵy basshysynyń orynbasary Talǵat Orazgeldiuly Lentasy qıylyp, esigi búgin aıqara ashylǵanymen, erteńgi kúni týrısterge shynaıy ári sapaly qyzmet kórsetilse eken desti jınalǵan jurt.
– Men týrısterge arnalǵan kıim tigýmen aınalysamyn. Endi osy jerde óz ónimderimdi satýǵa múmkindik týyp otyr. Mundaı ortalyqtyń ashylǵany óte durys boldy. Sebebi keıbir týrıster bul óńirdiń aýa raıyn bilmeıtindikten jeńil kıimmen keledi. Ondaı jaǵdaıda bizdiń taýǵa shyǵýǵa, saıahattaýǵa arnalǵan kıimder daıyn turady. Aqparattyq ortalyq jumysynyń jandanýyna barynsha úlesimizdi qosamyz, – deıdi «Altay outwear» brendin qalyptastyrýshy kásipker Saıat Baýyrjanuly.
Endi Altaıǵa at basyn tiregen týrıst aldymen osynaý ortalyqqa kelip, baǵyt-baǵdaryn aıqyndap alýyna ábden bolady. Qaıtyp bara jatyp aýylyna túrli kádesyı da ala kete alady.
Shyǵys Qazaqstan oblysy
