Atalǵan jobanyń ereksheligi – munda IT salasynda eńbek jolyn bastaǵysy keletin Ortalyq Azııa áıelderi «No code», «Freelance School», sondaı-aq «E-commerce» baǵdarlamalaý baǵyttary men basqa da sıfrlyq daǵdylardy tegin meńgere alady. Byltyr bastaý alǵan bul joba bıyl da jalǵasyn tappaq.
«Byltyr IT-Aiel baǵdarlamasy aıasynda elimizdiń túkpir-túkpirindegi 2634 áıel IT salasynda bilimin shyńdaý maqsatynda ótinim berdi. Olardyń qatarynda 900-den astam jumyssyz, 500 stýdent, 700 ózin-ózi jumyspen qamtyǵan qyz-kelinshek, sondaı-aq 400-den astam dekrettegi ana boldy. Birinshi lek túlekteri veb-saıttar men qosymshalar sııaqty óz IT-ónimderin meńgerdi. Osylaısha, olar qarjylyq táýelsizdik pen kásibı shyńdalýǵa mańyzdy qadam jasady. Bıyl baǵdarlamanyń ekinshi legi aıasynda áıelder tabysty mansap quryp, qoǵamnyń damýyna úles qosýǵa septigin tıgizetin jańa múmkindikke qol jetkize alady», dedi «Astana Hub» basqarýshy dırektory Danııa Ahmetova.
Jobanyń ekinshi legi aıasynda usynylatyn kýrs mazmuny: veb-saıttar, mobıldi qosymshalar, chatbottar men basqa da kod jazýdy qajet etpeıtin sıfrlyq ónimder qurýǵa arnalǵan «No Code School», qashyqtan jumys isteýge, óz baǵytyn tańdaýǵa, qyzmetterdi satýǵa jáne klıentterdi tartýǵa arnalǵan «Freelance School», maqsatty jarnamany ázirleýge, áleýmettik jelide paraqshalar júrgizýge, ınternet-dúken ashýǵa, halyqaralyq onlaın-alańdarda taýarlar satýǵa, onlaın-tólemderdi qosý men kıberqaýipsizdik negizderine úıretýge arnalǵan «Mastercard» qoldaýy bar «E-commerce» baǵdarlamalarynan quralǵan.
«2023 jyly dekrette otyrǵan kezimde áıelderge IT-mamandyqtardan tegin oqýdan ótýge, jumys pen otbasy arasyndaǵy tepe-teńdikti saqtaı otyryp, qashyqtan jumys isteýge múmkindik beretin «IT-Aiel» jobasyna qatystym. Oqytýdyń nátıjesinde balalar men jasóspirimder arasyndaǵy sıfrlyq gıgıena jáne kıberbýllıngtiń aldyn alý týraly bot-kómekshi «CyberBala» jobasyn qurdym, ony «No Code» quraldarynyń kómegimen jasadym», deıdi «IT-Aiel» baǵdarlamasynyń fınalısi, «CyberBala» jobasynyń avtory Álııa Orazymbetova.
«IT-Aiel 2.0» jobasyn Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa, «Astana Hub» halyqaralyq tehnoparki jáne «TechnoWomen» kommersııalyq emes uıymy júzege asyryp keledi. Qatysýshylarǵa IT-salasynda óz baǵytyn tabýǵa múmkindik beretin bul jobaǵa tirkelý 24 maýsymǵa deıin qabyldanady.
