Qostanaıda tórt aılyq balaǵa sırek ota jasaldy

QOSTANAI. 26 sáýir. Qostanaı oblystyq balalar aýrýhanasynda tórt aılyq sábıge  óńirde buryn jasalmaǵan erekshe  ota jasaldy. Dárigerler balanyń tynysyn bitep tastaıtyn tańdaıdaǵy jarǵaqshany alyp tastady. Bul týraly alau.kz habarlady. Kishkentaı Asqar Ardaq osydan bir aı buryn Naýyrzym aýdanynan kelgen bolatyn.  Alǵashqyda dárigerler qolqasyna sýyq tıgen dep oılady.  Qansha emdegenmen balanyń jaǵdaıy  nasharlaı berdi. Dárigerler balanyń tańdaıynda  jarǵaqsha bar ekendigin anyqtaǵan soń, birden  ota jasaý kerek dep sheshti. Sábıdiń tynys jolynyń bitelýine  eki mıllımetr ǵana sańylaý  qaldy. Buryn mundaı ota túri oblysta jasalmaıtyn. Astanadan sanıtarlyq avıasııamen tájirıbeli dáriger aldyryldy. Oblystyq balalar aýrýhanasy bas  dárigeriniń orynbaary Olga Son: «Biz dıagnozdy qoıǵanda «Ana men bala Ulttyq ortalyǵyndaǵy» mamandarmen habarlastyq. Ondaǵy lor dáriger osyndaı kúrdeli naýqastardy qaraıtyn elimizdegi birden bir maman», dedi. Osynsha kúrdeli operasııa  dárigerlerdiń bar-joǵy on mınýt ǵana ýaqytyn aldy. Qazir balanyń jaǵdaıy jaqsardy, ol  jan saqtaý bóliminen palataǵa  aýystyryldy. Dárigerlerdiń  aıtýynsha, balanyń ómirine eshqandaı qaýip joq. Oblystyq balalar aýrýhanasynyń dárigerleri endi mundaı otany ózderiniń de jasaı alatyndyǵyn aıtyp otyr. Názıra Járimbetova. Derek, sýret: alau.kz