Iá, álemniń túkpir-túkpirinde bilim alyp, talap-talantymen kópti moıyndatyp júrgen jastar qazaqta kóp. Sonyń biri – osy Málıka. Ol Nıý-Iorktegi áskerı akademııany tabysty támamdap, bitirý keshinde eń úzdik stýdent retinde sóz sóıleý mártebesine ıe bolǵan. Kópti tánti etkeni onyń úzdik atanǵandyǵynan buryn, muhıttyń arǵy betinde alty qurlyq órkenıetiniń basyn qosqan AQSh-ta ana tilinde ún qatyp, ata-anasyna alǵysyn jetkizýi boldy.
«Árdaıym maǵan jaqsylyq tilep, erkeligimdi kóterip, alystan ýaıymdap, meni saǵynyp júretinderińiz úshin kóp raqmet! Aýyrmańyzdar, ómir jastaryńyz uzaq bolsyn!» dep jas túlek ata-anasyna alǵysy men perzenttik júrekjardy lebizin bildirdi.
Bitirý keshindegi tolqynysty sát taspalanǵan bul vıdeony Nıý-Iorkte júrgen Qazaqstan fotografy Arken Avan jaqynda óziniń Instagram paraqshasynda jarııalady. Aıtýly sharaǵa arnaıy tapsyryspen basqa balany sýretke túsirýge barǵan ol minberden sóılep turǵan qazaq qyzyn kórgende tań qalǵanyn jáne shynaıy qýanǵanyn jasyrmady.
«Men úshin bul bir kútpegen jaıt boldy. Jumys barysymen Nıý-Iork áskerı akademııasynyń túlekterin fotoǵa túsirýge barǵanmyn. Dıplom alý sátinde bilim salasynda joǵary nátıje kórsetken qazaq qyzyn úzdik stýdent retinde sahnaǵa shaqyrdy. Minberge jarqyraı kóterilgen Málıka álemniń túkpir-túkpirinen jınalǵan qaýym aldynda qazaq tilinde ún qatyp, ata-anasy men ustazdaryna alǵysyn bildirdi. Qazaq qyzynyń qaısarlyǵy men ultjandylyǵy súısintti. Bul sát meni erekshe tolqytty», dep jazdy fotograf áleýmettik jelidegi paraqshasynda.
Beınejazbada taspalanǵandaı, Nıý-Iorkte ótken ómirindegi mańyzdy sátteriniń biri – dıplom alý keshinde Málıka óziniń júrekjardy lebizin aǵylshyn tilinde bastap, qazaqsha jalǵastyryp, keıin nemisshe sóıleıdi. Janaryna ultyna degen uly mahabbatty syıdyrǵan Málıkaǵa biz de sát sapar tileımiz.
