Sol sebepti baǵzy zamanda mergender jamby atý úshin júrisi taıpalǵan sý jorǵa minetin bolǵan. О́ıtkeni jorǵanyń júrisi jaıly, jyldamdyq yrǵaǵy birtekti. Mundaı jylqyny qazaq «jamby aty» dep áspettegen. Jambynyń aty – shaýyp nemese jorǵalap kele jatyp, nysana – jambyǵa jaqyndaǵanda qozǵalysyn asa jaıly tynysh yrǵaqqa aýystyra biletin qabiletti bolýǵa tıis.
Kóne derekterde mergen astyndaǵy atynyń tórt tuıaǵy jerden bir sátke qatar kóteriletin kezin túısigi arqyly ańdaıtyn bolǵan. Dál osy kezde jebe bosatqan jaǵdaıda onyń nysanaǵa dóp tııý múmkindigi zor.
Halqymyzdyń tarıhı jyrlar sanatyna jatatyn «Bógenbaı batyrdyń birinshi joryǵy» atty jyrda (Moldajan Jadaıulynyń nusqasy. – Babalar sózi: Júz tomdyq. – Astana: «Folıant», 2004. 58-tom.147-b) batyrdyń jamby atý úshin minetin atyn «Jamby ker» ataǵany aıtylady:
«Ekeýi qala berdi amandasyp,
Bet alyp tartty jalǵyz Kúnshyǵysqa.
Hosh aıtyp júrip ketti Bókeń batyr,
Astynda jamby ker at, qolda shatyr».
