Osy qos komandanyń joly Dıýsseldorftaǵy «Merkýr Shpıl-Arenada» qıysty. Báseke bastalǵannan aıaǵyna deıin damylsyz shabýylmen ótti. Bul joly da alǵashqy goldy Ivan Shrans soqty. Belgııalyqtarǵa qarsy oıynda ol nebári 7-mınýtta esep ashsa, bul joly 17-mınýtta mergendik tanytty. Biraq Dıýseldorfta slovaktar jeńisti ýysynda ustap qala almady. Eger osy kezdesýde jeńilse, jarys kestesindegi jaǵdaıdy túzetý óte qıyn bolatynyn jaqsy túsingen Ýkraına fýtbolshylary qarqyndaryn esh báseńdetpedi. Nátıjesinde, 54-mınýtta Nıkolaı Shaparenko tarazy basyn teńestirse, 80-mınýtta Roman Iаremchýk jeńis golyn soqty. Esep – 2:1.
«Eýro-2024» dodasynyń alǵashqy oıyndaryn sátsiz ótkizgen D tobyndaǵy Polsha men Aýstrııa Berlınde baq synady. 9-mınýtta Fılıpp Mveneniń áýelete tepken dobyn qorǵaýshy Gernot Traýner qaqpaǵa dóp túsirdi. Úziliske deıin Kshıshtof Pentek esepti teńestirdi. Odan keıin polıaktardyń oınynyń mánisi ketti. Al qarqynyn kúsheıtken aýstrııalyqtar taǵy eki ret nysanany dál kózdep, kózdegen maqsattaryna qol jetkizdi – 1:3. Bul goldardyń avtorlary – Krıstof Baýmgartner (66-mınýt) men Marko Arnaýtovıch (78-mınýt, penaltıden).
Leıpsıgtegi «Red Býll Arenada» osy toptaǵy favorıtter kúsh synasty. Shyny kerek, Nıderland pen Fransııa fýtbolshylarynan biz áldeqaıda qyzyqty ári sapaly oıyn kúttik. Onyń ústine jeńiske jetken ujym birden pleı-offqa joldama alatyn edi. Biraq ol úmit aqtalmady. Jankúıerler jaı bir ortanqol komandalardyń oınyn tamashalaǵandaı kúı keshti. Nıderlandtyń jas jartylaı qorǵaýshysy Havı Sımonstyń 69-mınýtta soqqan jalǵyz golynyń kýási boldyq. Biraq onyń ózi de offsaıdqa baılanysty sanalmady. Osylaısha, atalǵan jarysta alǵash ret 0:0 esebi tirkeldi. «Eýro-2024» jarysyn jalǵastyra almaıtyn birinshi komanda belgili boldy. Ol – Polsha quramasy. Qatarynan eki kezdesýde jeńilistiń kermek dámin tatqan polıaktar tipten sońǵy oıynda jeńiske jetken jaǵdaıda óz tobynda úshinshi orynǵa taban tireı almaıdy.
Senbide F tobyndaǵy eki oıyn ótti. Gambýrgtegi «Folksparkshtadıonda» Grýzııa men Chehııa sheberlik baıqasty. 46-mınýtta Jorj Mıkaýtadze penaltıden esep ashyp, quramasyn alǵa shyǵarǵan. Mundaı tartysqa talaıdan beri túsip kele jatqan cheh fýtbolshylary kóp uzatpaı-aq tarazy basyn teńestirip ketti. 59-mınýt órbigen tustaǵy standartty shabýyldy golǵa ulastyryp Patrık Shık tarazy basyn teńestirip ketti. Qos komanda osy nátıjeni olja tutyp tarqasty.
Dortmýndtaǵy «Vestfalenshtadıonda» Túrkııa men Portýgalııa arasyndaǵy tartys 0:3 esebimen aıaqtaldy. 21-mınýtta Bernardo Sılva esep ashqan. 28-mınýtta Sámet Aqaıdyn avtogol soǵyp aldy. 56-mınýtta Brýno Fernandes úshinshi goldy toǵytty.
E tobynda Belgııa fýtbolshylary Rýmynııa quramasyn erkin eńserdi. 2-mınýtta Iýrı Tılemans esep ashsa, 80-mınýtta Kevın De Brıoıne nátıjeni eselep, Belgııa quramasyna mańyzdy úsh upaıdy alyp berdi.
A tobyndaǵy 3-týr oıyndary da tartysqa toly ótti. Shveısarııa quramasy Germanııa quramasynyń esin ekeý, túsin tórteý ete jazdady. Ndoeniń 28-mınýtta soqqan golynan keıingi basymdyqty Shveısarııa quramasy 90 mınýt boıy ustap turdy. Matchtyń bas qazysy ıtalııalyq Danıel Orsato negizgi ýaqytqa 2 mınýt qosyp, Fıýllkrýg tarazy basyn teńestirip ketti. Osy toptaǵy sońǵy oıyndy ótkizgen Shotlandııa – Majarstan arasyndaǵy match 0:1 esebimen majarlardyń paıdasyna sheshildi. Matchtyń negizgi ýaqytynda gol soǵylǵan joq. Eki quramaǵa da jeńis aýadaı qajet edi. Argentınalyq tóreshi Fakýndo Telo qosymsha 10 mınýt ústep, sońǵy sekýndtar syrǵyǵanda Kevın Chobot shabýyldy óristetip, jeńis golyn soqty. Bul toptan pleı-off kezeńine Germanııa men Shveısarııa erkin ótse, Majarstan quramasy da áli úmit sáýlesin sóndirgen joq.
