Foto: gov.kz
«Elorda ákimdiginiń bastamasymen qolǵa alynǵan joba aıasynda memlekettik qoldaý sharalary, ataýly áleýmettik kómek, bıznes ashýǵa qajetti qujattardy resimdeý men jumys tabýǵa keńes beriledi», deıdi joba mamandary.
Joly bolǵandar jobanyń arqasynda, tipti eki qysqamerzimdi baǵdarlama aıasynda tegin oqıdy. Birinshi baǵdarlama naýbaıshy, barısta, satýshy-kassır, qoǵamdyq tamaqtandyrýdyń ámbebap qyzmetkeri, tiginshi sııaqty 5 jumysshy mamandyǵyn oqytýǵa arnalǵan. Al ekinshi baǵdarlama «Freelance múmkindik» dep atalady. Bul 7 sıfrlyq daǵdylardy oqytýdy usynady. Oǵan targetolog, SMM, vıdeograf, marketpleıs menedjeri, mobılograf, grafıkalyq dızaıner, veb-dızaıner qatarly mamandyqtar jatady.
Joba aıasynda kýrs oqyp, óz kásibin qolǵa alǵandardyń biri – Ǵamzat Imanmaǵzamov. Onyń aıtýynsha, jobanyń zamanaýı daǵdylardy úıretýi eldiń keleshegine paıdasy zor.
«Men «Joltap» jobasynda ınternet saýda baǵdarlamasy degen kýrstan óttim. Osylaısha, ınternet-saýdanyń qyr-syryn úırendim. Ustazymyz dáristerdi óte keremet ótkizdi. Oqýdan soń oı týyp, úıdegilerge ınternet arqyly saýda jasaýǵa bolatynyn aıttym. Qazir Qytaı eline tapsyrys berip, taýar tosyp otyrmyz. Taýarymyz kelgen soń marketpleıske shyǵamyz degen josparymyz bar. Munda tabys tabýdyń jolyn kórsetken jobaǵa jáne dáris bergen mamandar alǵysym zor», deıdi ol.
«Joltap» áleýmettik jobasyna júgingenderdiń 1 200-ge jýyǵy halyqtyń áleýmettik osal toptaryna jatady eken.
«Elorda turǵyndary tegin oqýdyń merzimi onkúndik kýrs jáne bir jarym aıǵa deıin sozylady. Oqytý baǵdarlamalary 18-50 jas aralyǵyndaǵy Astana turǵyndaryna qoljetimdi. Oqý aıaqtalǵannan keıin qatysýshylarǵa sertıfıkat beriledi. Qazir oqýshylar arasyndaǵy negizgi sanattyń 60 paıyzdan astamy – 35 jasqa deıingi jumyssyz turǵyndar», deıdi «Barshaǵa múmkindik» modýldik pýnktteriniń mamandary.
Astanadan bastalǵan tabysty joba endi óńirlerde de ashylmaq. Máselen, Premer-mınıstr Oljas Bektenovtiń tapsyrmasymen Qaraǵandy jáne Aqtóbe oblystarynda, Almaty jáne Shymkent qalalarynda jobany jalǵastyrý qolǵa alyndy. Jaqyn arada bul óńirlerdiń turǵyndary «Joltap» jobasyna qatysa alatyn boldy.
