«Red býll arenadaǵy» básekeniń alǵashqy 20 mınýty horvattardyń basymdyǵymen ótti. Osy sózimizdiń dáleli – osy ýaqyt aralyǵynda Zlatko Dalıchtiń komandasy dopqa ıelik etýde 80 paıyzdyq kórsetkishke qol jetkizdi. Árıne, olardy túsinýge bolady. Horvatııa quramasy osy oıynda jeńilgen jaǵdaıda «Eýro-2024» dodasymen qosh aıtysady. Tipten, teń esepti ózi qaýipti jaǵdaıdan qutqarmaıdy. Sol sebepti de «shaqpaq jeıdeliler» jıi shabýyldap, Italııany ábden qyspaqqa aldy. Sondaı qarqyndy shabýyldardyń birinde olar gol soǵýǵa da shaq qaldy. 5-mınýtta Lýka Sýchıchtiń aıyp alańynyń syrtynan qaqyrata tepken dobyn Djanlýıdjı Donnarýmma qaqpanyń «toǵyzdyǵynan» alyp shyqty. Odan keıin de Horvatııa fýtbolshylary birazǵa deıin qarqynyn báseńdetken joq.
Birinshi kezeń bel ortaǵa taıaǵan tusta ǵana Apennın túbeginen kelgen jigitterdiń oıyny durystalyp, bir júıege kele bastady. Kóbine-kóp qarymta shabýylǵa júgingen Lýchano Spallettıdiń shákirtteriniń de esepti ózgertýge múmkindikteri boldy. 27-mınýtta Alessandro Bastonı dopty baspen urdy. Desek te Domınık Lıvakovıchtiń keremet seıviniń arqasynda qaqpa aman qaldy.
Úzilisten keıin alańǵa tyń oıynshylar shyqty. Italııalyqtar Lorenso Pellegrınıdiń ornyna Davıde Frattezıdi shyǵarsa, horvattar Marıo Pashalıchti Ante Býdımırmen almastyrdy. Dál sol Frattezı qarbalas bir sátte dopty qolymen qaǵyp jiberdi. VAR-dyń «kómeginen» keıin tóreshi 11 metrlik aıyp dobyn belgiledi. Núktege Lýka Modrıch keldi. Onyń baǵyttaǵan dobyn Donnarýmma keri qaıtardy. Alaıda qaqpa aldyndaǵy qaýip seıilgen joq. Taǵy bir mezette Ante Býdemır nysanany qaıta kózdedi. Donnarýmma óz ornynan tabyldy. Biraq qaqpashynyń qaıtarǵan dobyna birinshi bolyp jetken Modrıch esep ashty – 1:0. Sóıtip, 38 jastaǵy Horvatııa quramasy kapıtanynyń esimi Eýropa chempıonatynda gol soqqan eń kart fýtbolshy retinde tarıhta qaldy.
Joǵarydaǵy esep oıynnyń sońǵy sekýndtaryna deıin saqtaldy. «Shaqpaq jeıdelilerdiń» bul matchta jeńiske jetetinine eshkimniń de kúmáni bolmady. Negizgi ýaqytqa tóreshi taǵy segiz mınýt qosty. Sol aralyqta da olar «Skýadra adzýrranyń» qarqyndy shabýylyna tótep berdi. Alaıda eń sońǵy segizinshi mınýtta qorǵaýshy Rıkkardo Kalaforıden tamasha pas alǵan jartylaı qorǵaýshy Mattıa Dzakkanıdiń «toǵyzdyqqa» baǵyttaǵan doby kózdegen jerine dóp tústi. Esep – 1:1. Osy teń oıynnyń arqasynda Italııa quramasy óz tobynda ekinshi oryn alyp, pleı-off dodasynda kúsh synasý qurmetine ıe boldy. Al nebári eki upaı jıǵan horvattar úshinshi orynda qalyp qoıdy.
* * *
Dıýsseldorftaǵy «Merkýr Shpıl-Arenada» Albanııa men Ispanııa quramalary arasynda ótken kezdesýdiń taǵdyryn 13-mınýtta Ferran Torres soqqan jalǵyz ǵana gol sheshti – 0:1. Sodan keıin Pıreneı túbeginen kelgen fýtbolshylar asyqpaı-aptyqpaı júrip-aq, ózderine qajetti esepti saqtap qaldy. Al qarymta qaıtaryp, jasyl alańdaǵy jaǵdaıdy túzeýge albanııalyqtardyń shama-sharqy men sheberlik deńgeıi jetpedi. Bul topta «Qyzyl fýrııa» jeke-dara kósh bastasa, Albanııa eline eńseleri túsip qaıtatyn komandalardyń qataryna qosyldy.
