Qyzdarymyzdyń basty qarsylastary kim?

50 kg salmaqta Nazym Qyzaıbaı kúsh synasady. Ol – álemniń eki dúrkin chem­pıony (2014, 2016 jyldary), sol jarystyń qola júldegeri (2012), Azııa birinshiliginiń jeńimpazy (2021). Biraq bul ataqtyń barlyǵyna Almaty oblysynyń týmasy asa jeńil salmaq dárejesinde qol jetkizgen. Onyń ústine Nazym jer-jahannyń myqtylary jınalǵan jarysta sońǵy ret osydan segiz jyl buryn jeńis tuǵyryna kóterilgen. Ony da esten shyǵarmaǵan jón. Sol ýa­qyt aralyǵynda birqatar alymdy ári qarymdy boksshylar shyǵyp, úlken arenada ózderiniń myqtylyǵyn moıyndatty. Iá, tórtjyldyqtyń basty dodasynda jasy 30-dan asqan Qyzaıbaıǵa jalyndy jastarymen aıqasý ońaı bolmaıtyny anyq.

Asa jeńil salmaqtaǵy favorıtterdiń arasynan Býsenaz Chakyroglýdy bóle-jara atap ótýge bolady. 28 jastaǵy Túrkııanyń sulýy 2021 jyly Tokıo Olımpıadasynda fınalǵa deıin jetip, 2022 jyly álem chempıony atandy. Onyń aldyndaǵy dúnıejúzilik dodada kúmispen kúptelip, Eýropa oıyn­dary men Eýropa chempıonattaryn eki retten utty. Parıjde rıngke shy­ǵatyn eki boksshy byltyr Nıý-Delıde uıymdastyrylǵan álem chempıonatynda bas júldeni olja­lady. Atalǵan jarysta ún­distandyq Nıhat Zarın 50 kg sal­maqta top jarsa, qytaılyq Iý Vý 52 kg salmaqta dara shyqty. Odan bólek, Výdyń Azııa oıyndarynyń je­ńimpazy, al Zarınniń sol jarystyń fınalısi degen ataqtary taǵy bar. Sondaı-aq ıspanııalyq Laýra Fýertes (álem chempıonatynyń qola júldegeri), taılandtyq Chýtchamat Raksat (álem chempıonatynyń eki dúrkin qola jáne Azııa oıyndarynyń kúmis júldegeri), fransııalyq Vasıla Lhadırı (álem chempıonatynyń qola júldegeri), mońǵolııalyq Esýgen Oıýýnseseg (Azııa oıyndarynyń qola júldegeri) syndy sportshylardy da favorıtter sanatyna jatqyzýǵa bolady. Dál osy mońǵol qyzy Hanchjoýdaǵy Azıadanyń shırek fınalynda Nazym Qyzaıbaıǵa shań qaptyrdy.

57 kg salmaq dárejesinde Karına Ibragımova sharshy alańǵa shyǵady. 27 jastaǵy Kókshetaý óńiriniń bylǵary qolǵap sheberi álem chempıonatynda úsh ret (2018 jyly, Nıý-Delı; 2022 jyly Ystanbul – kúmis, 2023 jyly Nıý-Delı – kúmis ) jeńis tuǵyryna kóterildi. 2022 jyly qurlyq chempıony, 2023 jyly Azııa oıyndarynyń kúmis júldegeri atandy. Qytaı elinde Karınany Azıadanyń altynynan aıyrǵan Lın Iý Tıng ekenin jankúıerler jaqsy biledi. Taıpeıdiń ókili álemniń eki dúrkin jáne qurlyq chempıony. Sol sebepti de Parıj Olımpıadasynyń bas júldesinen negizgi úmitker retinde osy boksshynyń esimi atalady. Aldaǵy baıraqty básekede Tıngten bólek, basqa da myqtylar baq synaıdy. Solardyń arasynan fılıppındik Nestı Petesıo (Tokıo Olımpıadasynyń kúmis júldegeri, álem chempıony jáne sol jarystyń kúmis júldegeri), ıtalııalyq Irma Testa (Tokıo Olımpıadasynyń qola júldegeri, álem chempıony jáne sol jarystyń kúmis júldegeri, qurlyq chempıony, Eýropa oıyndarynyń qola júldegeri), fransııalyq Amına Zıdanı (álem chempıonatynyń qola júldegeri, Eýropa oıyndarynyń jeńimpazy), bolgarııalyq Svetlana Staneva (álem chempıonatynyń qola júldegeri), ırlandııalyq Mıkaela Ýolshtyń (Eýropa oıyndary men qurlyq chempıonatynyń júldegeri) qazirgi kezdegi qarqyny óte kúshti.

75 kg salmaqta Valentına Halzova el na­mysyn qorǵaıdy. Ol da 27 jasta. As­tanalyq arý 2016 jyly álem chempıony atansa, atalǵan jarystyń sońǵy ekeýinde úshinshi tuǵyrǵa kóterildi. Desek te ataqty boksshyǵa Olımpıada lısenzııa­syna ıelik etý úshin kóp ter tógýge týra keldi. Valentına Azııa oıyndary men Italııadaǵy jarysta jer sıpap qaldy. Tek óziniń eń sońǵy múmkindigin sátti paıdalanyp, Parıjge baratyndardyń tizimine qosyldy.

Halzovanyń salmaǵyndaǵy myq­tylar mynalar: qytaılyq Lıý Sıan (Rıo Olımpıadasynyń qola, Tokıo Olım­pıadasynyń kúmis júldegeri, álem chempıony jáne sol jarystyń kúmis jáne qola júldegeri, Azııa oıyn­darynyń jeńimpazy jáne kúmis júl­degeri, qurlyqtyń eki dúrkin chempıony), Lovlına Borgohaın (Tokıo Olımpıadasynyń qola júldegeri, álem chempıony jáne sol jarystyń eki dúrkin qola júldegeri, Azııa oıyndarynyń kúmis júldegeri), marokkolyq Hadıdja ál-Mardı (álem chempıony, sol jarystyń kúmis jáne qola júldegeri, Afrıka oıyn­darynyń eki dúrkin jeńimpazy, Af­rıka chempıony), aýstralııalyq Keıt­lın Parker (álem chempıonatynyń kúmis júldegeri), fransııalyq Davına Mıshel (álem chempıonatynyń qola júldegeri), panamalyq Ateına Bılon (álem chempıony jáne fınalısi, Pana­merıka oıyndarynyń kúmis júldegeri), kanadalyq Tamara Tıbbo (álem chempıony jáne sol jarystyń qola júldegeri) jáne ırlandııalyq Aoıf O’Rýrk  (Eýropa oıyndarynyń jeńimpazy).

Kezinde dál osy salmaqta Marına Volnova men Darıǵa Shákimova atoı salyp, Olımpııa oıyndarynda jeńis tuǵyryna kóterilgen edi. Alǵashqysy – 2012 jyly Londonda, ekinshisi 2016 jyly Rıo-de-Janeıroda qola medaldy moıyndarynda jarqyratty. Endi sol jeńisti joldy Valentına Halzova jal­ǵas­tyrady degen úmittemiz.

Sóıtip, Parıj rınginde elimizdiń úsh burymdy boksshysy óner kórsetedi. Eldos Seıdallın jattyqtyratyn koman­daǵa biz sáttilik tileımiz. Nazym da, Ka­rına da, Valentına da jeńis tuǵyryna kóte­rilýge laıyq sportshylar.