Jastarǵa arnalǵan ekoklýb

«GREENPVL» ekoklýby — «Assambleıa jastary» res­pýblıkalyq qoǵamdyq birles­tiginiń Pavlodar oblysynda qolǵa alyp otyrǵan jańa baǵyt­tarynyń biri. El Prezıdenti Qasym-Jomart Toqaevtyń bas­tamasymen buǵan deıin elimizde «Taza Qazaqstan» ekologııalyq aksııasy júrgizile bastaǵany málim. Azamattardyń sanasynda tazalyq sezimin, qorshaǵan ortaǵa qamqorlyq qasıetterin uıalatý úshin mundaı jobalardy engizý óte mańyzdy. Assambleıa jastary klýbqa jınalyp, olarǵa ekologııalyq mádenıetti arttyrý boıynsha derekti fılm­der kórsetiledi. Sońynan týǵan ólkemizdiń ekologııalyq taqyryptary talqylanady. Klýbqa Qazaqstan halqy Assam­bleıa­synyń belsendi jastary múshe bola alady», dep atap ótti klýb uıymdastyrýshylary.

Qazirgi ýaqytta ekoklýbqa 50 jas azamat múshe bolyp úlgerdi. Uıym ishinde óńirimizge belgili ekolog ǵalymdar dáris oqyp, ta­nymdyq sabaqtar ótkizedi delinip otyr. Alǵashqy kúni jastarǵa fransýz rejısseri Iаn Artıýs-Bertrannyń «Úı» atty ǵylymı-tanymdyq fılm­i kórsetildi. Kartınada Jer ǵa­lamsharyndaǵy barlyq sulý­lyq kórsetiledi. Rejısser jer betindegi ǵajap úılesim men ekologııalyq tepe-teńdik adamzattyń áreketimen qalaısha buzylyp, apat týdyryp jatqany týraly keremet sýrettegen. Qorshaǵan ortaǵa zardaby mol ónerkásipter, alapat soǵystar men ekologııalyq apattar týraly keńinen maǵlumattar qamtylǵan. Jastar mundaı ta­nym­dyq dúnıelerdi kóre otyryp, boılarynda ekologııalyq sana-sezim qalyptastyrady degen senim zor.

Qazirgi ýaqytta oblys ortalyǵynyń jastary «Taza Qazaqstan» aksııasyna ún qosyp, tazalyq sharalaryn úzbeı júrgizip jatyr. Ertis, Ýsolka ózenderiniń jaǵalaýy, «Qazqonaq» tabıǵı eskertkishi mańy, saıabaqtar men skverler, balalar alańdary qoqystan tazartylyp, jastar qorshaǵan ortanyń tazalyǵyna beıjaı qaramaıtyndaryn baıqatty.

«Adamdardyń kóbi «Taza Qazaq­stan» ádettegi senbilik ótkizý dep oılaıdy. Deı turǵanmen bul aksııanyń máni tereńde, ol zamandastarymyzdy ekologııalyq turǵydan tárbıelep, qorshaǵan orta týraly bilimin jetildiredi. О́ńirlik jastar bastamalaryn damytý ortalyǵy ekologııalyq desant quryp, qa­la­­daǵy kópshilik oryndardy, úı aýlalaryn, saıa­baqtardy kó­shelerdi tazalaýǵa shyqty. Olar saýda úıleri men kóshelerde jurtshylyqqa býkletter taratady. Paraqshada qoqysty qalaısha bólek jı­naýdyń qara­paıym ádis­teri kórsetilgen. Máselen, plas­tık bótel­kelerdi qaıda tas­taýǵa bola­tyny aıtylady», deıdi oblystyq Jastar bastamalaryn da­mytý ortalyǵynyń dırektory Rızat Rahymjanov.

Pavlodar oblysy