Aqtaý qalasyn damytý, kórkeıtý basty nazarda tur. Bul baǵyttaǵy iri jumystar shaǵyn qadamdardan bastaý alary anyq. Osy oraıda Aqtaý qalasynyń kórkin saqtaý, turǵyndar men týrısterge jaıly demalys uıymdastyrý maqsatynda jaǵajaılardy qoqystan turaqty tazartyp turý – mańyzdy bastama.
Bul bastamanyń alǵashqy tańǵy tazalyq jumysyna Mańǵystaý oblysynyń ákimi N.Qılybaı, Ekologııa jáne tabıǵı resýrstar vıse-mınıstri M.Oshýrbaev pen «Jasyl el» eńbek jasaǵy, qala turǵyndary qatysty.
Aqtaý qalasy irgesindegi jaǵajaılar – jazda halyq kóp jınalatyn oryn. Munda kún saıyn on myńǵa jýyq adam Kaspııdiń móldir sýyna túsip, demalady. О́kinishke qaraı, olardyń sońynda jaǵalaýda túrli qoqys pen polıetılen, plastık qutylar qalady. Bul jaǵdaı jaǵajaıda senbilik jumysyn tek aksııa aıasynda emes, turaqty qalypta júgizýdi qajet etedi. Sondyqtan jaǵajaılarda ár sársenbi saıyn senbilik uıymdastyrý bastamasyn óńir turǵyndary qajettilik dep sanap, qýana qabyldady. Tazalyq is-sharasyna qatysýshylar ala tańnan bastap birneshe shaqyrymǵa sozylyp jatqan teńiz jaǵalaýyn qoqystan tazartyp, júzdegen qapshyqty kúl-qoqysqa toltyrdy. Sonymen qatar jaǵajaılardy abattandyrý jumysy júrgizildi.
«Tabıǵat – bizdiń tynysy-myz. Sondyqtan qorshaǵan ortany qorǵaý, oǵan janashyrlyqpen qaraý, qamqorlap ustaý – árbir adamnyń azamattyq paryzy. Qoldan kelgenshe tabıǵatty saqtaýǵa úlesimizdi qosyp júreıik», degen Mańǵystaý oblysynyń ákimi Nurdáýlet Igilikuly óńir turǵyndary men jastardy, qonaqtardy tabıǵatqa beıjaı qaramaı, tazalyq jumystaryna uıytqy bolýǵa shaqyrdy.
Kaspıı jaǵalaýynda bastaý alǵan aksııa ár sársenbi saıyn turaqty túrde ótkiziledi. Aqtaýlyq belsendi jastar bul chellendjdi jańaózendikterge joldady.
Mańǵystaý oblysy
