Orynbor oblysynda dúnıege kelgen 33 jastaǵy Damırdiń osy sport túrin serik etkeli 10 jylǵa jýyqtady. Sol aralyqta ol birqatar bıik belesti baǵyndyrdy. Atap aıtsaq, «Alash Praıd» Gran-prıiniń jeńimpazy jáne M-1 promoýsheniniń chempıony atandy. Qatarynan 14 jekpe-jekte jeńiske jetkennen keıin qandasymyz UFC-diń qyraǵy mamandarynyń nazaryna ilikti. Muhıttyń arǵy jaǵynda da Ismaǵulov ózin jaqsy qyrynan kórsetti. 2018-2023 jyldar aralyǵynda álemdegi eń beldi promoýshende óner kórsetken kezde jeti ret oktagonǵa shyqqan qazaqtyń qaısar uly alǵashqy bes qarsylasyn utty. Tarqatyp aıtsaq, ol aýstralııalyq Aleks Gordjıs, ıspanııalyq Hoel Alvares, brazılııalyq Tıaý Moızes pen Rafael Alvıs, shvesııalyq Gýram Kýtateladzeni qapy qaldyrdy. Biraq sońǵy eki kezdesýinde reseılik Arman Sarýkıan men amerıkalyq Grant Doýsonnan upaı sanymen utyldy.
О́ziniń sońǵy jekpe-jegin Damır Ismaǵulov bıyl naýryz aıynda Sankt-Peterbýrgte jergilikti sportshy Edýard Vartanııanǵa qarsy ótkizdi. Olar kıkbokstiń erejesi boıynsha aıqasty. Teń dárejede ótken básekede tóreshiler Vartanıandy jeńimpaz dep tanydy. Aralas jekpe-jektegi Damırdyń sherdogi – 27 kezdesý, 24 jeńis (13 nokaýt) jáne 3 jeńilis. Bir aıta keterligi, qandasymyz óziniń sporttyq mansabynda birde-bir ret aıqyn basymdyqpen utylǵan joq.
Damırdiń qarsylasy da osal sportshy emes. Jaýyngerlik sambodan aýyz toltyryp aıtarlyqtaı tabysqa jetken 23 jastaǵy Dmıtrıı Klımov MMA-da da jaqsy nátıje kórsetti. Ol Hardcore FC promoýsheniniń burynǵy chempıony. Onyń rekordy – 15 kezdesý, 11 jeńis (9 nokaýt), 4 jeńilis.
