Sport • 27 Maýsym, 2024

Jarys kúndeligi

102 ret

kórsetildi

2 mın

oqý úshin

Iordanııanyń astanasy – Ammanda 17 jasqa deıingi qyzdar arasynda ótken kúresten Azııa birinshiligin Qazaqstan quramasy alty qola medalmen qorytyndylady. Ol júldelerdiń ıegerleri – Sánııa Soltanǵalı (49 kg), Madhııa Ýsmanova (53 kg), Anna Stratan (57 kg), Uldana Tileýhan (65 kg), Zeınep Elamas (69 kg) jáne Aqbota Qadyr (73 kg). Odan keıin bozkilemge erkin kúres sheberleri (U-17) shyqty. Jarystyń alǵashqy kúni Ámir Orazbaev, Erǵalı Beıbarys, Baqdáýlet Ákimjanov úshinshi orynǵa taban tirese, kelesi táýlikte balýandar tolyq júldeler jıyntyǵyna ıe boldy. Atap aıtsaq, Edige Qasymbek altyn, Bekasyl Asambek kúmis jáne Bekzat Amangeldi qola medaldy enshiledi.

Ǵalym SÚLEIMEN

Qazaqstannyń semserlesýshileri (sablıa) Kýveıtte ótip jatqan Azııa chempıonatynda qola medalǵa qol jetkizdi. Bastapqy básekelerde О́zbekstan men Japonııany jeńgen jerlesterimiz jartylaı fınalda Iranǵa ese jiberdi. Bul komandanyń sapynda Baqdáýlet Quralbekuly, Artem Sarkasıan, Sattarhan Nazarbaı jáne Janat Nábıev óner kórsetti. Al buǵan deıin Erlik Sertaı shpagashylar saıysynda úzdik úshtikti túıindegen bolatyn.
Qazaqstannyń týy astynda óner kórsetetin kenııalyq jelaıaq, álem chempıony Nora Djerýtoǵa byltyr kúzde «dopıng qoldandy» degen aıyp taǵylǵan edi. Kúni keshe ǵana ol tolyqtaı aqtaldy. Shtab-páteri Parıjde ornalasqan Halyqaralyq tórelik soty istiń aq-qarasyn anyqtaı kele, Djerýtonyń eshqandaı da aramza áreketke barmaǵanyn dáleldep, joǵarydaǵydaı sheshim shyǵardy.
Taldyqorǵanda shossedegi velosporttan Qazaqstan chempıonaty aıaqtaldy. Erler arasyndaǵy 178 shaqyrymdyq toptyq básekede Dmıtrıı Grýzdev top jardy. Ekinshi jáne úshinshi oryndarda – Gleb Brýsenskıı men Iogan Shteın. Áıelderdiń 100 shaqyrymdyq saıysynda Rınate Sultanova altynnan alqa taqsa, kúmis pen qola medaldy Vıoletta Kazakova men Elızaveta Sklıarova ıelendi.
Qazaqstan chempıonatynda baq synaıtyn О́skemenniń «Altaı» klýbynyń bas bapkeri bolyp Vahıd Masýdov taǵaıyndaldy. Bul esim jankúıerlerge jaqsy tanys. 64 jastaǵy Jambyl fýtbol mektebiniń túlegi ótken ǵasyrdyń 80-jyldary Almatynyń «Qaıratynyń» sapynda jasyndaı jarqyldady. Úlken sporttan qol úzgen soń elimizdiń túrli komandalary men Qazaqstan quramasyn jattyqtyrdy.