Prezıdent pármeni

Adamda eki ómir bola ma? Kimde qalaı, bilmedim. Meniń taǵdyr jolym eki kezeńnen quralǵan. Jol apatyna deıingi jáne keıingi. Anam meni on eki múshemdi saý qylyp ómirge ákeldi. Tipti, balpanaqtaı bolǵanym sonshalyqty, kóterip júrýge qınalǵan eken. Bozbala shaǵymda abaısyzda kóliktiń astyna túsip, bel omyrtqamnan zaqym aldym. Jazym ǵoı. Qazir qolarbada otyramyn. Bul jaǵdaıǵa birden úırenip kettim deı almaımyn. Aıaqta jan joq. Eshteńeni sezbeıdi. Biraq, keýdemde qaınap jatqan erik-jigerim, jastyq jalynym kúıdirip barady. Bir ǵalamat kúsh paıda bolyp, aıaǵyma jan bitirse, toqtamaı júgirýge ázir­deı­min. Aıaǵym yrqyma kónse, Gımalaıdyń shyńyn baǵyn­dy­rardaı pármenim bar sekildi. Osylaı armandap, tórt qabyr­ǵaǵa talaı muń shaqtym. Biraq, ýaqyt bárine emshi eken. Kún­derdiń kúninde óz-ózimdi áb­den qaıradym. Aıaǵym bolmasa da basym aman ǵoı. Mıymdy eshkim urlaǵan joq. Boıymdaǵy talantym she? Ony nege shekteýim kerek?! Bir kúnde sahnaǵa shyǵam, án salyp, ózimniń tolyqqandy adam ekenimdi dáleldeımin dep sheshtim. Sóıttim de ákeme óz qalaýymdy aıttym. Júregi jarylardaı qýandy. Ásirese, anamnyń qaıǵysy seıilgendeı kórindi maǵan. Meni oılap, qaıǵydan qan jutyp júrgenderin jaqsy bile­min ǵoı. Bizdiń qoǵam qolarbada otyr­ǵan adamdardy aıap, músirkegennen ári aspaıdy. Bizge óli men tiriniń arasyndaǵy shalajansardaı qa­raıdy. Al meniń oı-órisim, maqsatym, baǵytym, qabiletim – barlyǵy jalyndaǵan ot sekildi. Onyń alaýyna ózim de kúıip keterdeı kúı keshemin. Alǵashqy ánimdi «Bári jaqsy bolaryna senemin» dep atadym. Halyq jyly qabyldady. Osy ánmen res­pýblıkalyq konkýrsqa qatysyp, bas júldeni jeńip, 5 mıllıon teńgeni ıemdendim. О́tken jyly Prezıdent Nur­sultan Nazarbaev «Altyn sapa» jáne «Paryz» syılyqtaryn tapsyrý jıynynda kásipkerlerge, Úkimetke: «Múgedek jandardy kóptep jumysqa alyńdar. Olar­dyń da arasynda belsendi, qabi­letti adamdar barshylyq», – dep qadap aıtty. Elbasynyń osy tapsyrmasynan keıin múmkindigi shektelip qalǵan kóp­tegen azamattarǵa sheksiz múm­kin­dikter berile bastady. Onyń qa­tarynda men de barmyn. Elimiz­diń basty arnasy, qara shańy­raq «Qazaqstan» ulttyq tele­ar­nasyna telejúrgizýshi bolyp qabyldandym. Qazir ár juma saıyn «Jan jylýy» degen áleýmet­tik telejýrnaldy el nazaryna usy­nyp kelemiz. Bul – jaı habar emes, jylaǵan júrekterdi juba­typ, áleýmettiń áleýetin kóterýge atsalysýǵa baǵyttalǵan joba. «Jan jylýy» baǵdar­la­ma­synyń efırge shyqqanyna bıyl 5 jyl. Osy ýaqyt aralyǵynda baǵ­darlamanyń septigimen jetim­der úıinen 20 bala otbasyna baryp, jańa ata-ana, týys-baýyr­dyń ortasynda, 13 bala shetelderde em alyp, aman-esen elge oralǵan. Qazir olardyń bar­lyǵy da óz qataryna qosylyp, júgi­rip júr. «Jan jylýynyń» kómegi­men úısiz-kúısiz júrgen 8 otbasy baspanaly boldy. Sonymen birge, Elbasynyń «Qazaq­sta­n­nyń áleýmettik jańǵyrty­lýy: Jalpyǵa Ortaq Eńbek Qoǵa­myna qaraı 20 qadam» atty baǵdar­lamalyq maqalasynda aıtylǵan talaptarǵa saı keletin adamdarmen suhbattasamyn. Olar – qol-aıaǵynan aıyrylsa da, taǵdyry buralań jolǵa salsa da moıy­maǵan, Úkimet maǵan ne beredi dep qarap otyrmaǵan, eshkimge alaqan jaımaıtyn adamdar. Olarda masyldyq pıǵyl joq. Olar – múgedek bolsa da óz arbasyn ózi súırep, bala-shaǵa, otbasyn eńbek terimen asyrap otyrǵan qaıratkerler. Ondaı adamdar bizdiń aramyzda az emes. Biraq, olardy kópshilik bile bermeıdi. Olar aýyl-aýyldarda, shalǵaıda jatqan aýdandarda turady. Biz sol kisilerdi izdep taýyp, tepse temir úzetin, on eki múshesi saý bola tura eki qolǵa bir is tappaı júrgen qandastarymyzǵa úlgi etýdi maqsat tuttyq. Meniń qolarbamen telearna tizginin ustaýym ózime ǵana emes, otbasyma, meni tanıtyn jora-joldastaryma qýanysh syılady. Adam bolyp ómirge kelgen soń eshkimnen kem bolmaı, qoǵamda óz ornyńdy taýyp, ortańa paıdańdy tıgizip ǵumyr keshý qandaı baqyt! Men óz taǵdyryma razymyn. Aıaqqa turyp júrip ketýden de kúderimdi úzgen emespin. Men baǵyndyrar belester áli de alda! Bizge senim artqan Elbasynyń úmitin áli-aq aqtaımyz! Qaıta qatarǵa qosyp, baqytty sátter syılaǵanyńyz úshin ózińizge myń alǵys! Arman QARYNSAÝ, «Jan jylýy» baǵdarlamasynyń júrgizýshisi. ASTANA.