Ozat oqýshy kópbalaly otbasynan shyqqan. Aıymnyń anasy Aıgerim Manatqyzy perzentiniń mektepti «Altyn belgige» bitirgenin, bilimge erekshe qushtar ekenin aıtty.
– Qosshy qalasynda turamyz. 6 balam bar. Aıym – tuńǵyshym. Ol ájesiniń menshiginde. Mektepti «Altyn belgimen» bitirip, osyǵan qosa 100 myń teńge syıaqy alǵan bolatyn. Kishkentaıynan óte alǵyr, qajyrly, oqýǵa yntaly boldy. Bizde ata-ana retinde múmkindigimizshe oǵan qoldaý bildirip kelemiz, – dedi anasy.
Al Aıymnyń ózi eki shet tilin tańdap otyrǵanyn jetkizdi. Ol osy jetistikke qol jetkizý úshin uıaly telefonnan alshaqtap, kitapqa kóbirek kóńil bólipti.
– Bilimge qushtar jaqsy orta taptym, birge daıyndaldym. Telefonnan alshaqtap, kitapqa kóńil bóldim. Ýaqytymdy tıimdi paıdalanýǵa tyrystym. Ata-anamnyń úmitin aqtaǵanyma qýanyp turmyn. Osy ortalyqqa 10-synyptan bastap kelip, daıyndalyp júrmin. Dúnıejúzi tarıhy jáne aǵylshyn tili pánderin tańdadym. Osy oraıda ata-anama jáne ustazdaryma alǵys aıtamyn. Alla qalasa, L.N.Gýmılev atyndaǵy Eýrazııa ulttyq ýnıversıtetinen eki shet tili mamandyǵyn tańdap otyrmyn, – dedi A.Erjanova.
UBT úzdigi «Zerdeli» aqyl-oıdy damytý ortalyǵynda testileýge daıyndalǵan eken. Osyǵan oraı oǵan atalǵan ortalyq dırektory Yrysbek Máýituly 5 mıllıon teńge jáne iPhone 15 telefonyn syılady. О́tken aptada 140 ball alǵan Jannur Eńsebekti Ǵylym jáne joǵary bilim mınıstri Saıasat Nurbek quttyqtap, baǵaly tehnıka syılap, ata-anasyna alǵys bildirdi. Sondaı-aq túlekti daıyndaǵan ustazdardyń róline de toqtalyp ótti.
– Jannurdyń UBT-da joǵary kórsetkish kórsetýi – eńbekqorlyqtyń, shydamdylyq pen yntanyń nátıjesi. Bul rette ata-ananyń qoldaýy, qamqorlyǵy men balaǵa degen senimin de aıtý kerek. Sondaı-aq muǵalimderdiń de kásibıligi men jumystaryna degen adaldyǵynyń jemisi. Bul qýanyshty sát ómirdegi jańa jetistikter men jeńisterdiń bastamasy bolsyn! – dedi mınıstr S.Nurbek.
