Etnolagerdiń negizgi maqsaty – balalardyń jazǵy demalysyn tıimdi uıymdastyra otyryp, ulttyq sana-sezimi qalyptasqan, jalpyadamzattyq qundylyqtardy ózara ushtastyra alatyn ultjandy tulǵa tárbıeleý. Maýsymda jumysyn bastaǵan etnolager shildeniń sońyna deıin tórt aýysym boıy jumys
isteıdi.
«Tilimizdi, dinimizdi, ónerimizdi oqýshylar bala kúninen bastap boıyna sińirýi kerek. Sonda biz naǵyz ultjandy azamatty, elimizdi kórkeıtetin qyz ben ul tárbıeleımiz. Sheber muǵalimderimiz, ájeler qaýymy óskeleń urpaqqa kıiz basýdy, jún tútýdi, qamshy órýdi, basqa da qolónerdi, terimen jumys isteýdi, ulttyq taǵamdar daıyndaýdy úıretedi», dedi M.Áýezov atyndaǵy №86 mektep-gımnazııa dırektory Gúlmıra Oralqyzy.
«Saryjaılaý» etnolagerinde birinshi maýsymda 300-ge jýyq oqýshy demaldy. Al qazir ekinshi maýsymda 200-ge tarta oqýshy qamtylǵan. Buǵan deıin qalyptasqan, taptaýryn lagerlik júıege tyń jańashyldyq engizip, ulttyq bolmysty taný turǵysynda uıymdastyrylǵan osyndaı lagerdi babadan qalǵan muralardy keleshek urpaqqa jalǵaýdyń altyn kópiri deýge tolyq negiz bar.
Bul jaqta kún tártibi «Qara jorǵa» bıimen bastalady. Odan keıin «Salt-dástúrlerdi úırený», «Qolóner», «Ulttyq taǵamdar», «Qysh óneri» sııaqty sheberlik sabaqtary ótedi. Buǵan qosa, «Ulttyq dástúrin ulyqtaǵan urpaq» taqyrybynda «Ájeler mektebiniń» sabaqtary, toǵyzqumalaq, bes asyq sııaqty ulttyq oıyndar, robottehnıka jáne STEM sabaqtary, dombyra men án sabaqtary uıymdastyrylady.
Atalǵan etnolagerde oqýshylar jazǵy demalysyn tıimdi ári paıdaly ótkizetini anyq. On kún boıy bir úıirmege qatysyp, ózi qyzyqqan isti nemese ónerdi tolyq úırenbese de, álippesin meńgerip, tanym irgetasyn qalyptastyryp shyǵady. Aıta keteıik, Astana qalasy bilim uıymdarynyń bazasynda 97 mektep janyndaǵy lager, oqýshylardyń qyzyǵýshylyqtary boıynsha 75 beıindik lager jáne 21 etnolager bar.
