Keńes Qazaqstan jáne Qytaı bıznes ortasy úshin pikir almasý alańyna aınaldy, sonymen birge saýda-ekonomıkalyq jáne ınvestısııalyq yntymaqtastyqty jandandyrýdy kózdeıdi.
Keńestiń kezekti otyrysyna Premer-mınıstrdiń birinshi orynbasary Roman Sklıar, Qazaqstan-Qytaı iskerlik keńesiniń teń tóraǵalary – «Samuryq-Qazyna» AQ basqarma tóraǵasy Nurlan Jaqypov pen «CITIC Group» dırektorlar keńesiniń tóraǵasy Sı Gýohýa, Halyqaralyq saýdany damytý jónindegi Qytaı komıtetiniń tóraǵasy Jen Hýnbın qatysty. Budan bólek, is-sharaǵa 500-den astam bıznes ókili men 70-ten astam qytaılyq iri kompanııa ókili qatysty.
Qor basshysy N. Jaqypov otyrystyń ashylý rásiminde sóılegen sózinde Qytaı Qazaqstannyń ınvestısııalyq seriktesteriniń bestigine kiretinin, keńes eki el arasyndaǵy yntymaqtastyqty odan ári damytýdy kózdeıtinin atap ótti.
«Samuryq-Qazyna» qory ınvestorlarmen birlesip jumys isteıdi, ıaǵnı birlese ınvestısııalaý quralyn qoldanady. Iаǵnı kapıtalǵa birlese kirip, táýekelderdi bólisemiz. Sonymen qatar óz tarapymyzdan memlekettik organdarmen tıimdi jumys isteýge, qajetti qujattardy resimdeýge kómek kórsetemiz. Bul jumystar bizdiń ınvestorlar úshin senimdi seriktes ekenimizdi kórsetedi», dep atap ótti qor basshysy Nurlan Jaqypov.
«Samuryq-Qazyna» ulttyq ál-aýqat qory 81 mlrd dollardy quraıtyn aktıvterdi basqarady. Búginde Qytaı, BAÁ, Saýd Arabııasy, Reseı, Italııa, AQSh, Qatar, Fransııa sekildi ózge de elderdegi seriktesterimen birlesip, aýqymdy jobalarǵa ınvestısııa quıady.
Qor qytaılyq «CITIC Group», «CNPC», «CNNC», «CGN», «Sany», «CRRC», «State Power Investment Corporation», «China Power International Holding», «Power China», «Huawei» sııaqty jetekshi kompanııalarmen tabysty jumys istep, yntymaqtastyq aıasyndaǵy iskerlik tájirıbesin arttyryp keledi.
Keńes qorytyndysy boıynsha jalpy quny 3,7 mlrd astam dollar bolatyn 40-tan astam qujatqa qol qoıyldy. Onyń ishinde 15 qujatqa «Samuryq-Qazyna» kompanııalar toby qytaılyq áriptesterimen qol qoıdy. Bul qatarda qytaılyq «SANY Renewables Energy» kompanııasymen jel elektr stansalaryna qajetti qalaqtar, gondolalar men munaralar qurastyratyn zaýytty lokalızasııalaý, «SANY Group» kompanııasymen arnaıy tehnıkalar (tıegish, traktor, ekskavator, júk avtomobıli) shyǵarý boıynsha elimizde zaýyt salý múmkindigin zertteý sııaqty megajobalar bar.
Iskerlik keńes alańynda «Sılleno» jobasyna ınvestısııalyq bıýdjetti kelisý týraly «Sinopec» hattamasyna qol qoıyldy. Iаǵnı Atyraý oblysynda qýattylyǵy 1,25 mln tonna bolatyn polıetılen óndiretin alǵashqy ıntegrasııalanǵan gaz-hımııa kesheni salynady. Polıetılen óndirý jobasyn iske asyrý otandyq bızneske jańa múmkindikter beredi. Osylaısha, el ekonomıkasy úshin mýltıplıkatıvtik áseri basym bolmaq.
Sondaı-aq «Qazaqstan temir joly» portfeldik kompanııasy forým barysynda «CRRC»-pen elimizge 559 mln dollarǵa 200 lokomotıv jetkizý jaıynda kelisim jasasty. Manevrlik teplovozdar jaqsartylǵan qurylymdyq jáne tartý parametrlerine ıe. Olar Qazaqstannyń klımattyq jaǵdaıyna sáıkes jasalǵan, ıaǵnı qysqy -40°C-tan jazǵy +50°C-qa deıingi temperatýrada jumys isteı beredi. Keshe ǵana Altynkól stansasyna alǵashqy manevrlik lokomotıvter jetkizildi.
Joǵaryda atalǵan jáne ózge de aýqymdy jobalardyń barlyǵy eki eldiń ınfraqurylymy men ekonomıkasyn damytýda mańyzdy kezeńge aınalmaq.
Aqmaral BAIаZITOVA
