«О́mir bar jerde qaza bar» demekshi, bir jeti bolmaı Almagúldiń dúnıeden ozǵanyn estip, abdyrap qalǵanymyz ras. Bar ómirin Syr elinde ótkizip, óńirdiń órkendep damýyna aıryqsha úles qosqan qabyrǵaly azamat, belgili tulǵa boldy. Onyń erekshe qaısar, qajyrly bolýymen qatar, barynsha ádil de adal qaıratker ekenine kóz jetkizdik.
Almagúl Bojanqyzy 1946 jyly burynǵy Tereńózek aýdanynyń Aınakól aýlynda týyp, Qyzylózek, Telman atyndaǵy mektepte bilim alyp, ony pedýchılıshedegi oqýymen jalǵastyrdy. 1964-1972 jyldary Shaǵan aýlyndaǵy balabaqsha meńgerýshisi, №132 orta mektepte ustaz, 1972-1988 jyldarda Tereńózek aýdandyq komsomol komıtetiniń 1-hatshysy, mektep dırektory, aýdandyq partııa komıtetiniń hatshysy qyzmetterin atqardy. 1988 jyly aýdandyq atqarý komıtetiniń tóraǵasy, 1992-1997 jyldary aýdan ákimi bolyp saılandy. Sol tusta respýblıkamyzda alǵash saılanǵan áıel ákim boldy. Bul kezeń burynǵy odaq tarap, keńsharlar joıylyp, ne isteý kerektigin bajaılaı almaı turǵan óliara shaqta A. Bojanova bar kúsh-jigerin jumsap, aýdandy tyǵyryqtan alyp shyqty.
Uıqysyz túnder, damyl tappaǵan kúnderi óz jemisin berdi. Tereńózek aýdanynyń ekonomıkasy, mádenıeti men bilimi, óneri damydy, halyqtyń ál-aýqaty artty. Osyndaı jetistikterdiń basynda Almagúl Bojanova turdy.
1999 jyly Qyzylorda oblysy máslıhatynyń hatshysy, «Nur Otan» partııasy fılıalynyń basshysy sııaqty qyzmetterdi oıdaǵydaı atqaryp, olardyń jumysyn jańa deńgeıge kótere bildi. Jasynan Q.Qazantaev, E.Kósherbaev, N.Ergeshbaev syndy aıtýly azamattardan úlgi-ónege alǵan A.Bojanova eseli eńbeginiń nátıjesinde elge syıly boldy. Ony kózimiz kórdi.
1973 jyly «Qurmet belgisi» ordenimen, el táýelsizdigi jyldarynda Qazaqstan Respýblıkasy Prezıdentiniń Jarlyǵymen «Qurmet», «Parasat» ordenderimen qatar, ondaǵan medalmen marapattalǵan, Syrdarııa aýdany men Qyzylorda oblysynyń Qurmetti azamaty atanǵan edi. Keıingi jyldary «Urpaqtan-urpaqqa» qoǵamdyq birlestigin ashyp, jas urpaqty tárbıeledi. Ártúrli taqyrypta birqatar tanymdyq kitap jazdy.
A.Bojanova aýdandyq, oblystyq keńesterdiń depýtaty, partııa organdarynyń múshesi bolyp saılandy. Alekeń rýhanı, mádenı isterge óte mán beretin jáne zııaly qaýym ókilderine asqan qurmetpen qaraıtyn. Á.Tájibaev, Á.Nurpeıisov, Q.Muhamedjanov, Á.Jumabaev, Á.Jámishov, Sh.Murtaza, F.Ońǵarsynova, K.Ahmetova, Iran-Ǵaıyp jáne basqa aqyn-jazýshylarmen tyǵyz baılanysta boldy. Almagúlge aqyndar óleńderin, jazýshylar aq tilekterin arnady.
«Jazmyshtan ozmysh joq», emendeı berik, qajymas qaırat ıesi bolǵan Syr eliniń báıteregi qulady. Alaıda A.Bojanovanyń Syr halqyna sińirgen eńbegi umytylmaq emes. О́ıtkeni ol jasaǵan ıgilikti isterdiń izi bar demekpiz.
Qosh bol, jatqan jeriń jannat bolǵaı. Syr eli sizdi umytpaıdy.
