Aısultan áý basta qarapaıym gıps untaǵyna zertteý jasap, odan ne shyǵarýǵa bolatynyn anyqtaǵan. Gıpsti qurylysqa, taǵy da basqa qajettilikterge paıdalanýǵa bolady. Sonyń bárine tájirıbe jasap, sońynda gıpsten qysh ydysqa uqsas toıbastar qobdıshalaryn, aqsha salatyn jáshik, túrli-tústi qorap buıymdaryn jasap shyǵady. Bul zattar toılarda úlken suranysqa ıe bolǵan.
«Kem degende bir toıǵa 100 qorap jasap beremiz. Bul Taldyqorǵanda suranystyń joǵary ekenin kórsetedi. Biraq biz istep jatqan zattarǵa kóptegen dúken ıeleri salmaqty kózqaraspen qaramaıdy. Alǵa qoıǵan maqsatymyz – shahardaǵy búkil dýmandy merekege ónim usynyp, turǵyn úılerdiń gıps arqyly bezendiriletin tusyna atsalysý. Qazirdiń ózinde ózimizdiń jeke tutynýshylarymyz paıda bolyp keledi. Osy baǵyttan taımasaq áli úlken maqsatqa jetemiz», deıdi Aısultan.
Eń qyzyǵy sol, jas ta bolsa bas bolǵan jas kásipker eki adamdy jumyspen qamtyp otyr. Olarǵa tabystyń belgili bir paıyzyn tóleıdi.
Talapshyl órenniń osy ispen aınalysýyna ıdeıa qaıdan kelgenin aıtpaı ótpeske bolmas. Barlyǵy onyń «Ádep-quqyq jumysy jónindegi mentor» jobasynyń qaladaǵy №21 orta mektepte uıymdastyrylǵan sátinen bastalǵan. Aısultan ol jerde «Asar» sporttyq-saýyqtyrý ortalyǵynyń jetekshisi Eldos Baıalyshbaevty jolyqtyrady. Onyń ótken sabaq dárisinen keıin kókeıine ıdeıalar uıalap, erekshe serpin alady. Kóp aıaldamaı, kásip ashýǵa bel sheshe kirisip ketedi.
«Oqýshy bolsam da qazirgi ýaqytta eresek adamnyń aılap júrip tabatyn qarjysyn taýyp júrmin. Meniń bir túıgenim – kásipte janqııarlyq qajet. Úzdiksiz damý bolmasa qoǵamnyń suranysyna saı jumys isteı almaısyń. Árıne, biz joqtan bar jasadyq demeımiz, tek jańa ıdeıamyzdyń nátıjesin kórip otyrmyz», deıdi jas kásipker.
Jas kásipker ózi qatarly jastardyń bos ýaqytyn tıimdi paıdalanýy mańyzdy ekenin aıtady. Kóp ýaqytyn uıaly telefonmen, paıdasyz qydyrys, oıyn-saýyqpen ótkizip jatqan adamdardan uly is shyqpaıdy. El bolashaǵy úshin búgingi urpaq jan aýyrtýy kerek dep sanaıdy. Namysshyl órenniń bul oıyna biz de qosyldyq.
Jetisý oblysy
