Jambyldyq saılaýshylardyń 49,9 paıyzy daýys berdi

TARAZ. 26 sáýir. Jambyl oblysynyń saılaýshylary búgingi naýqanda belsendilik tanytýda. Taraz qalasyndaǵy №50 saılaý okrýginde kúndizgi saǵat 10-ǵa deıin 800-ge jýyq saılaýshy óz tańdaýyn jasap úlgerdi. Bul týraly egemen.kz tilshisi habarlady. Ýchaskede saılaýshylarǵa barlyq jaǵdaı jasalǵan. Aýlada ásem án qalyqtap jatsa, ishte daýys berýshilerdiń keıbiri shahmat, doıby oıyndaryn qyzý kirisip ketipti. Sondaı-aq, saılaý ýchaskesi janynda saýda dúńgirshekteri qoıylyp, el qajetti azyq-túlikterin satyp alýda. Al, Taraz qalasyndaǵy №39 saılaý okrýgine alǵashqylardyń biri bolyp kelgen 78 jastaǵy Botabaı Maldybaev aqsaqal el taǵdyry sheshiletin jaýapty sátke beı-jaı qaraı almaıtynyn aıtady. Búginde beınetiniń zeınetin kórip otyrǵan qarııa daýys berýge ájeı ekeýi kelipti. Al, Jambyl polıtehnıkalyq kolledjiniń stýdenti Zahar Sharıpov óz tańdaýyn №35 saılaý okrýginde jasady. Bolashaq jylyjaı mamany Zahar osy naýqanǵa at salysyp, daýys bergenine óte qýanyshty. «Tańerteń erte turyp, saılaý ýchaskesine jetkenshe asyq boldym, bul men úshin úlken jaýapkershilik» deıdi ol. Jambyldyq saılaýshylardyń óz tańdaýlaryn jasaýda belsendilik tanytýy, árıne, olardyń bul jaýapty sátke asqan jaýapkershilikpen qaraıtynyn bildirse kerek. Birligi, yntymaǵy jarasqan eldiń halqy osyndaı uıymshyl bolady. Oblystyq saılaý komıssııasynyń málimetine qaraǵanda saǵat 12-ge deıin jambyldyq saılaýshylardyń 49,9 paıyzy, ıaǵnı, 256 944 adam daýys berdi. Oblys boıynsha 461 saılaý ýchaskesi bar. Oralhan Dáýit. Derek, sýret: egemen.kz