Qujat elimizdiń seısmologııalyq qaýipsizdigin nyǵaıtý boıynsha aýqymdy sharalardy iske asyrýdy kózdeıdi. Olardyń ishinde monıtorıngti aıtarlyqtaı kúsheıtý, ǵımarattar men qurylystardyń seısmıkalyq tózimdiligin qamtamasyz etý, jańa sıfrlyq tehnologııalardy engizý, kadrlardy daıarlaý deńgeıin arttyrý, t. b. bar.
Osylaısha, 15 seısmıkalyq aýdandastyrý kartasy ázirlenedi, bul elimizdiń seısmıkalyq qaýipti óńirlerindegi jer silkinisi oshaqtarynyń 70%-yn boljaýǵa múmkindik beredi. Sondaı-aq olar atalǵan aýmaqtardaǵy ǵımarattar men qurylystardy pasporttaýǵa jáne jańa qurylys normalaryn ázirleýge negiz bolady.
Pasporttaý eń osal qurylys obektilerin anyqtaýǵa múmkindik beredi, olarǵa qatysty birinshi kezekte seısmıkalyq qaýiptiligin tómendetý sharalary qoldanylady. Onyń ishinde: seısmıkalyq kúsheıtý, qundy jabdyqtardy qorǵaý nemese shyǵarý, maqsatyn ózgertý taǵy basqalary bar.
Sonymen qatar 285 seısmıkalyq stansany ornatý, sondaı-aq qolda bar 70 stansany jóndeý jáne jaraqtandyrý kózdelgen. Bul Almaty oblysynda jáne elimizdiń basqa da seısmoqaýipti óńirlerinde seısmıkalyq qaýipti sapaly boljaýǵa múmkindik beredi. О́z kezeginde qajetti áreket etý sharalary jedel qabyldanady.
Budan basqa, ǵımarattardyń qurylysy men jumys isteýine baqylaýdy kúsheıtý, monıtorıng ádisterin jaqsartý, seısmologııa salasyndaǵy mamandardy zamanaýı jabdyqtarmen jáne tehnıkalyq quraldarmen qamtamasyz etý josparlanyp otyr.
Seısmıkalyq qaýipsizdikti qamtamasyz etý – Úkimettiń basym baǵyttarynyń biri, óıtkeni Qazaqstannyń seısmıkalyq aımaqtary respýblıkanyń jalpy aýdanynyń shamamen 40%-yn alady. Elimizdegi seısmıkalyq qaýpi joǵary óńirler — Almaty, Shymkent qalalarynyń, Almaty, Jambyl, Qyzylorda, Túrkistan, Shyǵys Qazaqstan, Abaı jáne Jetisý oblystarynyń aýmaqtary.
Jalpy alǵanda, Keshendi jospardy iske asyrý nátıjesinde seısmıkalyq qaýipti aýmaqtardaǵy azamattardyń, qurylystar men ınfraqurylymnyń qorǵalý deńgeıi aıtarlyqtaı kúsheıýge tıis. Sondaı-aq jer silkinisi bolǵan kezde memlekettik organdar men beıindi uıymdar tarapynan den qoıý júıesi jetildiriledi.
