Sýretterdi túsirgen: Mádı SALYQ
«Dombyra – ulttyq rýh» dep atalǵan jańa mýzeıdiń ashylý saltanatyna Batys Qazaqstan oblysy ákiminiń orynbasary Baqytjan Narymbetov arnaıy kelip, mýzeı meımandaryn Ulttyq dombyra kúnimen quttyqtady.
«Jańa mýzeı zaman kóshinen qalmaıdy, jańa qarqynmen, jańasha serpinmen jumysyn jalǵaıdy dep senemin», dedi óz sózinde Baqytjan Haberuly.
Jıynda óńirge tanymal tarıhshy, ólketanýshy, mádenıet salasynyń ardageri Jaısań Aqbaı da quttyqtaý sóz sóılep, tarıhtyń uzaq kóshinde qazaq halqy týdyrǵan ǵajaıyp kúı óneriniń erekshe baǵaly ekenin aıtty. On saýsaǵynan kúı tógilgen kúıshini halyq el bılegen kósem, daý toqtatqan sheshen, aqıyq aqynmen qatar qurmettegenin baıandady.
Osy kúni mýzeı qoryna áıgili Yqylas Dúkenuly ustaǵan qobyzdyń kóshirmesin Dına Nurpeıisova atyndaǵy qazaq halyq aspaptary akademııalyq orkestriniń solıst-qobyzshysy, ónertaný kandıdaty, Qazaqstan Respýblıkasynyń Mádenıet salasynyń úzdigi, Yqylas atamyzdyń urpaǵy Aqnar Táttibaıqyzy resmı túrde tabystap, Yqylas Dúkenulynyń «Aqqý» kúıin oryndady.
Jańa mýzeıdiń ashylýyna Qazaqstannyń eńbek sińirgen mádenıet qyzmetkeri, kúıshi-dombyrashy Ermek Qazıev, «Eren eńbegi úshin» medaliniń ıegeri, dombyrashy-sheber Edige Nábıev, Qazaqstan Respýblıkasynyń eńbek sińirgen qaıratkeri, Qurmanǵazy atyndaǵy saz kolledjiniń dırektory Nurjan Sertekov, «Oral sazy» folklorlyq-etnografııalyq ansambli, BAQ ókilderi, mýzeı qyzmetkerleri qatysty.
Shyǵys stıli baıqalyp turatyn kóne ǵımaratta ornalasqan Dombyra mýzeıi 4 zaldan turady. Onyń alǵashqysy – Dombyra tarıhy zaly. Munda dombyranyń kóne túrleri, tipti Altaı taýynyń bir úńgirinen tabylǵan, V ǵasyrdaǵy kóne túrki dáýirine jatatyn abyz dombyranyń maketi, kúı ónerine baılanysty qazaq ańyzdarynyń sýretteri, HIH-HH ǵasyrǵa jatatyn dombyralar kolleksııasy qoıylǵan.
Ekinshi, Qurmanǵazy Saǵyrbaıuly atyndaǵy zalda kúı atasynyń 1962 jyly BQO mýzeı qoryna alynǵan saýyty alǵash ret ekspozısııaǵa qoıylǵan. Sondaı-aq aqyn, batyr Mahambet О́temisulynyń sýreti men dombyrasy, Qurmanǵazynyń sýreti men dombyrasynyń kóshirmesi, tóre kúıleriniń negizin salýshy Dáýletkereı Shyǵaıulynyń sýreti, Dına Nurpeıisovanyń dombyrasy men shapany, kúıshi Seıtek Orazalyulynyń beınesi jáne qazaqtyń kıiz úıi qoıylǵan.
Úshinshi zal «Qurmanǵazy orkestri zaly» dep atalady. Munda aty aıtyp turǵandaı, Qurmanǵazy orkestriniń negizin qalaýshy Ahmet Jubanov, Evgenıı Brýsılovskıı, Luqpan Muhıtov, Qambar Medetov, Mahambet jáne Naýsha Bókeıhanov jáne t.b. tulǵalardyń fotosýreti, Qalı Jantileýov, Oqap Qabıǵojın jáne Tuıaqberdi Shámelovtiń dombyralary, Shamǵon Qajyǵalıevtiń kostıými, orkestrda oınalǵan aspaptary men sahnalyq kıimderi qoıylǵan.
Al «Batys óńiriniń dombyrashylary zaly» dep atalǵan tórtinshi zalda Batys óńiriniń kúıshilik jáne ánshilik mektebi ókilderiniń fotosýretteri, dombyralary jáne sahnalyq kıimderi qoıylǵan. Mámen Erǵalıuly, Meńdiǵalı Súleımenov, Erǵalı Esjanov, Makar Japarov, Muhıt Bıtenov fotosýretteri, Ǵarıfolla Qurmanǵalıevtiń sahnalyq kıimi, dástúrli ánshi Qalamqas Orashevanyń sahnalyq kıimi, Jaqsylyq Sársenǵalıev, Qalampyr Rahımova jáne t.b. tulǵalardyń fotosýreti, Batys óńirde alǵash qurylǵan orkestrlerdiń fotosýretteri men dombyralary qoıylǵan.
«Qazaq kúı ónerinde Batys Qazaqstan ólkesiniń orny erekshe. Sondyqtan Oral qalasynda dombyra mýzeıin ashý jaıly kópten oılanyp júrgen edik. Osy ıdeıamyz dál búgin – Ulttyq dombyra kúni júzege asqanyna qýanyshtymyn», deıdi oblystyq tarıhı ólketaný mýzeıiniń dırektory Mırbolat Ersaev.
Batys Qazaqstan oblysy
