Eske sala keteıik, jeksenbi, 7 shilde kúni Sarysý aýdany Jańatas qalasynda qatty jaýyn-shashyn saldarynan kólbeý aǵyn qalyptasyp, birqatar kóshedegi 400-den astam úıdiń aýlasy men 47 úıdiń ishin sý aldy.
Shyǵyndy esepteý, qosymsha naqtylaý sharalary jalǵasyp jatyr.
Jergilikti atqarýshy organ jáne Tótenshe jaǵdaılar departamentinen jumyldyrylǵan 50-den astam adam turǵyndarǵa kómektesip, sý aıdaý jumystaryn júrgizip jatyr. Budan bólek, 17 birlik tehnıka tartylyp, 11 motopompa qoldanylyp otyr. Qajetti tehnıkalar sanyn arttyrý úshin jedel sharalar qolǵa alynǵan.
Qazir arnaıy tehnıkalardyń kómegimen sýdy toqtatý, baǵytyn burý jumystary úzdiksiz atqarylyp jatyr.
Zardap shekken turǵyndar úshin qabyldaý pýnkteri daıyndyqqa keltirildi. Azamattardy tasymaldaýǵa arnaıy kólikter qarastyrylǵan.
Jalpy, tótenshe jaǵdaı saldaryn joıý, qalypqa keltirý boıynsha naqty jumystar júrgizilip otyr.
Erbol Qarashókeev jedel shtab otyrysynda bolǵan jaǵdaıdyń qaıtalanbaýy úshin sebebin zerdeleý boıynsha jaýapty tulǵalarǵa naqty mindetter júktedi.
«Arnaıy komıssııa qurylyp, turǵyndarǵa, zardap shekken nysandarǵa zań talaptaryna sáıkes barlyq qajetti kómek, qoldaý kórsetiledi. Biz bul qıyndyqty da birge eńseremiz», degen óńir basshysy atalǵan jaǵdaı jeke baqylaýynda bolatynyn basa aıtty.
Aıta keteıik, aýdandaǵy ahýal turaqty, sý deńgeıi tómendedi. Adam, mal shyǵyny joq.
Jambyl oblysy
