Foto: parlam.kz
Rınat Zaıytov Prezıdent Qasym-Jomart Toqaev óziniń halyqqa joldaýynda otandyq ónimdi damytý jóninde naqty tapsyrmalar bergenin atap ótip, ókinishke qaraı, ulttyq ónim óndirýshilerin qoldaý baǵytynda naqty sharalar qabyldanbaǵanyn tilge tıek etti.
«Kerisinshe, otandyq óndirýshilerdi barynsha aıaqtan shalyp, ilgeri bastyrmaı jatqan bıýrokratııa men zańsyzdyqtarǵa jıi kýá bolyp júrmiz! Atap aıtar bolsaq, solardyń biri – qazirgi tańda bankrot bolýǵa shaq qalyp otyrǵan «BSB Trade» kásiporny. Tarqatyp aıtsam, 2022 jyly tapsyrys berýshi retinde Qazaqstannyń Qorǵanys mınıstrligi ónim berýshi retinde «BSB Trade» kompanııasymen kompıýterlermen qamtamasyz etý jóninde 724 mıllıon teńgege jýyq qarajat kóleminde shart jasasqan», dedi depýtat.
Onyń aıtýynsha, tapsyrys aıasynda kompanııa mınıstrlikke 2 368 arnaıy kompıýter bergen.
«Biraq tapsyrys berýshi «BSB Trade» kompanııasyna talapty kúsheıtip, taýardy qabyldaýdan bas tartqan. Shart «Almaty qalasynyń Sot saraptamasy ınstıtýty» jáne «Atameken» UKP-nyń oń qorytyndysyna qaramastan, tapsyrys berýshi tarapynan buzylǵan. Bul jaǵdaıdyń eń qıyny, tapsyrys berilgen 2 368 kompıýter arnaıy aqparattyq qaýipsizdikti saqtaý maqsatynda jabdyqtalǵandyqtan, kóptegen ereksheligine baılanysty jalpy qoldanysqa jaramsyz. Al bul degenimiz – olardy basqa jaqqa satý múmkin emes degen sóz. Erekshe tapsyrysty oryndap, dalada qalǵan «BSB Trade» kompanııasy zańdy quqyǵyn qorǵaýda ádildik taba almaı, memorgandardyń bosaǵasyn tozdyryp júr. Saldarynan kompanııanyń jumysy toqtap, 150 adam jumyssyz qaldy», dedi májilismen.
Bul málimdeme Úkimet basshylyǵyn dúrliktirgen edi. Májilis depýtaty kótergen «kompıýter daýyn» birneshe quzyrly organ teksergen. Aqyry depýtat keltirgen derek jalǵan bolyp shyqqan.
Bul týraly Premer-mınıstrdiń orynbasary - Ulttyq ekonomıka mınıstri Nurlan Baıbazarov Májiliske joldaǵan jaýabynda málim etti.
Qarjylyq monıtorıng agenttiginiń aqparatyna súıensek, «BSB Trade» kompanııasynda 150 jumysker joq, tek 7 jaldamaly jumysker tirkelgen. Sondaı-aq onda múliktiń bary da anyqtalmaǵan.
«Qazaqstannyń Qarýly Kúshteriniń muqtajy úshin kompıýter satyp alý máselesi týraly depýtattyq saýal qaraldy. Bul rette 2022 jyly 2 368 jıyntyq kompıýter men qosalqy kerek-jaraq satyp alynǵany da rastalmady. Qorǵanys mınıstrliginiń aqparaty boıynsha 2022 jylǵy 30 qarashada «BSB Trade&Advertising» jaýapkershiligi shekteýli seriktestigi men Qorǵanys mınstrligi arasynda jalpy somasy 729 344 000 teńgege 2 368 jıyntyq kompıýter jetkizýge memlekettik qorǵanystyq tapsyrys sharty jasalǵan. Sonda jetkizý merzimi – Qazynashylyq organynda tirkelgen sátten bastap 15 kúntizbelik kún ishinde dep belgilengen. Biraq Qorǵanys mınıstrligi komıssııasynyń qabyldaýy barysynda tehnıkalyq erekshelik talaptaryna sáıkessizdik anyqtaldy», dedi vıse-premer.
Qorǵanys mınıstrligi bul jaǵdaı týraly kompanııany 2022 jyldyń 19 jeltoqsanynda belgilengen tártippen habardar etken. Habarlamaǵa sáıkessizdiktiń anyqtalǵanyn rastaıtyn akt qosa berilgen.
«Osyǵan baılanysty Qorǵanysmıni taýardy qabyldaýdan bas tartty jáne 2022 jylǵy 20 jeltoqsanda seriktestikpen aradaǵy shart birjaqty tártippen buzyldy. Sondaı-aq ondaı ónimdi jetkizgen «BSB Trade&Advertising» JShS-in memlekettik satyp alýlardyń josyqsyz qatysýshy dep taný jáne odan turaqsyzdyq aıyppulyn óndirip alý úshin sotqa talap-aryz jiberildi. Astana qalasynyń mamandandyrylǵan aýdanaralyq ekonomıkalyq sotynyń 2023 jylǵy 8 aqpandaǵy sheshimine sáıkes, JShS memlekettik satyp alýlarǵa josyqsyz qatysýshy dep tanyldy. Sot kompanııanyń qarsy talaptaryn qabyldaǵan joq», dedi Nurlan Baıbazarov.
Nurlan Baıbazarovtyń aıtýynsha, májilismenniń depýtattyq saýalynda aıtylǵan dálelderdi buryn sot ınstansııalary qarap jáne oǵan túbegeıli quqyqtyq baǵa berilgen.
«Bul máselege baılanysty Astana qalasy sotynyń Azamattyq ister jónindegi sot alqasy 2023 jylǵy 14 shildede qaýly shyǵardy. Onda ol birinshi ınstansııadaǵy sottyń atalǵan JShS-in memlekettik satyp alýlarǵa josyqsyz qatysýshy dep taný jáne odan turaqsyzdyq aıyppulyn óndirip alý bóligindegi sheshimin joıdy, biraq qalǵan bóligindegi sheshim ózgerissiz qaldyryldy. Joǵarǵy Sottyń Azamattyq ister jónindegi sot alqasynyń 2023 jylǵy 23 qazandaǵy qaýlysymen JShS-niń kassasııalyq tártippen qaraý úshin bergen ótinishhaty qabyldanǵan joq», dep naqtylady Nurlan Baıbazarov.
Inbusiness.kz-ke silteme jasap.
