Foto: QR Úkimetiniń baspasóz qyzmeti
Úkimet otyrysy barysynda Avtojol salasyn damytý máselesi qaralyp, Premer-mınıstr Oljas Bektenov bıyl elimizde birqatar iri jobalar aıaqtalatynyn atap ótti. Olardyń qatarynda «Qaraǵandy – Almaty», «Aqtóbe – Qandyaǵash», «Atyraý – Astrahan» jáne «Taldyqorǵan – О́skemen» bar. Sondaı-aq shamamen 2,5 myń shaqyrym jolda jóndeý jumystary qolǵa alynǵan.
«Iske asyrylyp jatqan jobalardan basqa, jańalaryn ýaqtyly jobalaý men daıyndaýdy qamtamasyz etý qajet. Birinshi kezekte, jer ýchaskelerin aldyn ala rezervke qoıý kerek. Jobalardyń iske asyrylýy aldymen osyǵan baılanysty. Kelesi ózekti máseleniń biri – qarjylandyrý. Keıbir óńirlerde jalpy sıpattaǵy transfertterdi ıgerý qarqyny tómen. Mysaly, mundaı problemalar Aqtóbe, Túrkistan jáne Ulytaý oblystarynda bar», dedi Oljas Bektenov.
Úkimet basshysy qurylys maýsymy qysqa dep sıpattalatyn soltústik jáne shyǵys óńirlerde erekshe mańyzdy jobalardy iske asyrý merzimderiniń múltiksiz saqtalýy máselesin kótergen. Osyǵan baılanysty qoıylǵan mindetterge qysqa merzimde qol jetkizý úshin barlyq sharalardy qabyldaý tapsyryldy.
Sonymen qatar Premer-mınıstr el azamattarynyń negizinen jergilikti mańyzy bar joldardyń jaı-kúıine qatysty shaǵymdaryna da toqtala ketti.
«Aqtóbe oblysy Muǵaljar aýdanynyń turǵyndary Juryn men Qarakól aýyldarynyń arasynda bıyl tóselgen asfalttyń sapasyn kórsetti – jańadan tóselgen asfalt qolmen úgitilip jatyr. Al Jetisý oblysy Kerbulaq aýdany Qoıankóz aýylynyń turǵyndary asfalt tóseý tehnologııasyn saqtamaǵan merdiger kompanııany óz jumysyn toqtatýǵa májbúr etti. Ákimdikter qaıda, nelikten kúndelikti sapaly baqylaý júrgizilmeı jatyr? Birinshi kezekte turǵyndardyń shaǵymdaryna dereý jaýap berý kerek», dedi Premer-mınıstr.
