Shıelenisti ótken shırek fınal

Dese deıtindeı, fýtbol sańlaǵy Krıshtıaný Ronaldýdyń ózi penaltıden ǵana gol toǵytyp, altynshy ret qatysqan Eýropa chempıonatynyń shırek fınalynan qaıtty. Fransııa men Por­týgalııa quramasy 2016 jylǵy Eýropa birinshiliginiń fınaldyq básekesinde toqaılasqan. Dúnıe kezek, sol tartysta Ederdiń 109-mınýtta soqqan goly Portý­galııa quramasyna Eýropa chem­­pıonatynyń at basyndaı kýbogin ustatqan-dy. Bul joly tarazynyń aýyr basy Fransııa quramasyna qaraı aýdy. Negizgi ýaqytta da, ekstra taımda da teń túsip, (0:0) penaltı serııasynda 3:5 esebimen fransýz fýtbolshylary jartylaı fınalǵa shyqty. Penaltı serııasynda kópshilik Portýgalııa quramasynyń alǵa ozaryna shúbásiz sendi. Se­bebi 8/1 fınaldyq tartysta Slo­venııa quramasyn Portýgalııa fýtbolshylary penaltıde yǵys­tyrsa, slovenııalyq Iosıp Ilıchı, Iýre Balkoves, Benıamın Verbıchtiń tepken dobyn Portýgalııa qura­masynyń qaqpashysy Dıogo Koshta qaı­taryp suńǵylalyq tanytqan. Bul joly Koshtanyń kóregendik qasıeti júrisinen jańyldy. Fransııa quramasynyń bes fýtbolshysy Dıogonyń qaqpasynan sańylaý tapty. 

Fransııa quramasynyń qor­ǵaýshysy Vılıam Salıba fı­naldyq tartysqa shyǵatynyna bek senimdi ekenin jetkizdi. Matchtan keıin pikir bildirgen qorǵaýshy qurama músheleriniń bir úıdiń balasyndaı uıymshyldyq ta­nyt­qanyna razylyǵyn aıtty. «2022 jyly Qatarda ótken álem chempıonatynyń fınalynda Argentına quramasyna penaltı serııasynda jol berdik. Osy jeńilis bizdi eseıtti, nátıjesi mine, jartylaı fı­nalǵa jettik», dedi 67-mı­nýtta Antýan Grız­­mandy almastyryp alańǵa shyqqan shabýylshy Ýsman Dembele. «Penaltı – qashanda lotereıa. Birde bizge aý­ǵan jeńis fransýz fýt­bolshylaryna baılandy. Biz Eýropa chempıonatynyń shırek fınalyna deıin qalaı oınadyq, deńgeıimiz qanshalyqty ósti degendi taldaý mańyzdy», dedi Portýgalııa quramasynyń qor­ǵaýshysy Rýben Dıash. 

Ispanııa quramasy  Eýropa chempıonatynyń jartylaı fınalyna shyǵar jolda Germanııa fýtbolshylaryn 2:1 esebimen jer soqtyryp ketti. Bul matchtyń da daqpyrty men daýy birazǵa deıin basyla qoımasy anyq. Ásirese tartysqa qazylyq etken Entonı Teılor Jamal Mýsıalanyń soq­qysyn qolymen qaqqan Mark Kýkýrelıanyń áreketine penaltı tepkizbeýi talaı jerde aıtylatyny sózsiz. 

Shveısarııa quramasy  shırek fınalda Anglııa fýtbolshylaryna penaltı serııasynda ese jiberdi. 75-mınýtta Embola esep ashyp, Shveısarııa quramasy alǵa shyq­qan, 80-mınýtta Sa­ka tarazy basyn te­ńes­tirip jeńilisten qutqaryp qaldy. Eks­tra taımda da ná­tı­je ózgergen joq. Penaltı serııa­synda 5:3 esebimen aǵylshyn fýtbolshylary basym tústi. 2021 jyly ótken Eýropa chem­pıonatynyń shı­rek fınalynda da Shveı­­sarııa qu­ra­masy Ispanııa fýtbolshyla­ryna penaltıden ese jibergen edi.

Túrkııa quramasy Nıder- land fýtbolshylaryna 2:1 esebimen jol berdi. 35-mınýtta Arda Gúlerdiń pasyn golǵa ulastyrǵan Aqaıdyn Sámettiń shabýylynan keıin túrik fýtbolshylary basymdyqqa ıe bolǵanymen, tájirıbeli sańlaqtardyń bilik­tiligine arqa súıegen Nıderland quramasy jeńisti julyp áketti. 70-mınýtta De Vreı Stefan tarazy basyn teńestirgen. 76-mınýtta qar­sylastyń shabýylyna tosqaýyl qoıýǵa umtylǵan Mert Móldir óz qaqpasyna gol soǵyp aldy.

 Túrkııa quramasynyń bas bap­keri Vınchenso Montella tú­rik­tiń jas qyrandaryn sha­ryqqa ustaǵandaı qaırap, shyń­daýdan ótkizdi. Jıyrmaǵa jasy jetpegen Arda Gúler qalaı tú­ledi. О́zgúr, Ba­rys Iylmaz, Ah­medjan Kap­lan, Semıh Qylysh­soı syndy fýtbolshylary 20-dan endi asqan. Demek Túrkııa quramasynyń dáýir­leıtin shaǵy alda. Eki jyldan keıin álem chempıonatynda jigitter jasyn oınatatyn deńgeıge jetetinin kórsetti.