foto: Májilistiń baspasóz qyzmeti
«Ertis ormany» bas dırektorynyń mindetin atqarýshy Qazbek Ametovtiń aıtýynsha, tehnıka parkin jańartý jumysy jalǵasyp jatyr. Atap aıtqanda, 8 traktor satyp alyndy. Q.Ametov qyzmetkerlerdi jańa tehnıkamen qamtamasyz etý jumysyn jalǵastyrý asa mańyzdy ekenin aıtsa, bólim basshysy Qobylandy Atyǵaev byltyr ormanshylardyń jalaqysy óskenimen, osy salada jumys isteıtin júrgizýshiler men órt sóndirýshilerdiń eńbekaqysy joǵarylamaǵanyn alǵa tartty.
Májilis depýtaty Nurjan Áshimbetov Memleket basshysynyń tapsyrmasymen 2023 jylǵy 1 shildeden bastap tek órt sóndirýshilerdiń jalaqysy kóterilgenin túsindirdi. Bolashaqta tehnıkalyq personaldyń jalaqysyn 2 ese ósirý qajet.
Al depýtat Vera Kımniń aıtýynsha, orman sharýashylyǵy salasyna kadr tartý úshin «Dıplommen aýylǵa» syndy túrli memlekettik baǵdarlamalar usynatyn múmkindikterdi paıdalaný qajet.
– Joǵary oqý oryndaryn támamdaǵan jas mamandar shalǵaıdaǵy orman sharýashylyqtaryna jumysqa ornalasýǵa asyqpaıdy. Sebebi olarǵa baspana men jaıly ómir súrý jaǵdaıyn usynatyn múmkindik joq. Kadrlardy ustap qalý úshin salada jumys istep jatqan jergilikti jas mamandarǵa jáne jalpy jastarǵa aýdan ákimdikterinen aýdanda suranysqa ıe mamandyqtar boıynsha bilim berý granttaryn usyný, biliktilikti arttyrý kýrstaryn uıymdastyrý, kóterme járdemaqy tóleý, turǵyn úı, jumys ornyn usyný tájirıbesin keńeıtý qajet, – dedi ol.
