Sýretti túsirgen – Erlan OMAR, «EQ»
Kórmege ótken ǵasyrdyń kórnekti ǵımarattary, alǵashqy saýda úıleri jáne kóne qala kósheleriniń sýretteri qoıyldy. Aqmola dalasynyń HIH ǵasyrdaǵy bederli beınesinen bastap búgingi Astananyń kórikti kórinisteri tanystyryldy.
Alǵashqy bolyp sóz alǵan fılologııa ǵylymdarynyń doktory, professor Serik Negımov Astananyń arǵy tarıhynan baıan etti. «Qan jýsandaı egilgen qadym zamannan bastap bul ólkeniń tarıh sahnasynda mańyzy erekshe boldy. Bergi dáýir beınesinde onyń saıası róli tipti aıqyndala tústi. Qazaqtyń sońǵy hany Kenesarynyń keskilesken shaıqasy men Jumabek Táshenovtiń arpalysqan aıqasy – Alash balasy úshin Aqmola ólkesiniń qundylyǵyn birjola dáleldep bergen oqıǵalar. Abyzdardyń armany, babalardyń amanaty bolyp jetken Astana – bul kúnde memleketimizdiń júregi», dedi ǵalym.
Iá, ýaqytynda Memleket basshysy Qasym-Jomart Toqaev: «Elordanyń jylnamasy táýelsiz Qazaqstannyń shejiresimen tyǵyz astasyp jatyr. Shyn máninde, astanany kóshirý geosaıası turǵydan óte durys qadam boldy. Bul – halqymyzdyń bolashaq taǵdyryn aıqyndaǵan asa mańyzdy jáne der kezinde qabyldanǵan tarıhı sheshim», degen bolatyn.
«Astananyń bir ereksheligi, toǵyz joldyń torabynda turǵan qala. Patsha ókimeti kezinde de solaı edi. Kire tartýshylar Aqmola arqyly ótetin. Iаǵnı áýel bastan Astana qalasy mańyzdy ortalyq boldy, zaman aǵymyna saı qalyptasa bastady. 1994 jyldyń 6 shildedegi Joǵarǵy Keńestiń otyrysy – Qazaq eliniń tarıhynda úlken oryn alatyn oqıǵa. Astanany kóshirýge qatysty kóp qarsylyq boldy. Aqyry pikirtalastan keıin tarıhı qaýly qabyldandy. Sonyń jemisin kórip otyrmyz. Elordamyz kúnnen-kúnge ósip, ónip, órkendeýde», dedi Astana qalasy Memlekettik arhıviniń dırektory Jangeldi Bımoldın.
Is-shara barysynda ulttyq arhıv dırektory Saǵıla Nurlanova arhıvtik qujattary saqtap, keıingi urpaqqa jetkizýdiń mańyzyn atap ótti. «О́tkenin bilmegen el erteńine senimmen qaraı almaıdy. Búgingi qujat – erteńgi tarıh. Arhıvtik qujattar – tarıhymyzdyń sarqylmas qory. Sondyqtan muraǵatqa muqııat qaraý – kelesi býynnyń aldyndaǵy basty paryzymyz», dedi S. Nurlanova.
Quttyqtaý sózderden keıin kórme tusaýy kesilip, kópshiliktiń nazaryna usynyldy.
