Memlekettik qurylymdar da, qarapaıym turǵyndar da qamshynyń órimindeı birigip, qoıan-qoltyq jumys istedi. Ásirese Qazaqstannyń 11 oblysynan, 3 qaladan kelgen áskerı qyzmetshiler eń qıyn jerde, sý tasqynymen betpe-bet kelgen qaýipti nysandarda júrdi.
– Oral qalasynda ornalasqan Ulttyq ulannyń «Batys» óńirlik qolbasshylyǵyna qarasty 5517 áskerı bóliminiń jaýyngerleri alǵashqy kúnnen-aq sý tasqynynyń aldyn alýǵa kiristik. Jeke quram áýeli sý basý qaýpi joǵary jerlerde arnaıy bógetter quryp, kósheler men aýlalarda jınalyp qalǵan qardy shyǵaryp, sýdyń óz arnasymen júrýi úshin aryqtardy tazalady. Keıin tikeleı qutqarý jumystarymen de aınalystyq, – deıdi 5517 áskerı bóliminiń batalon komandıri, maıor Jasulan Kórpeshov.
Osynaý tarıhı kúnderi erekshe erligimen kózge túsip, adam ómirine arasha túsken sarbazdar da bar.
Sáýirdiń 21-i kúni Oral qalasynyń irgesinde, Jaıyq ózeni jaıylmasynda ornalasqan saıajaı aýmaǵynda tasqyn sý jasandy bógetti buzyp ótti. Birneshe kúnnen beri sýdy bógep, qum salynǵan qapshyqtan qorǵan turǵyzyp júrgen saıajaı turǵyndary kún sanap ekpini kúsheıgen aǵyn sýǵa qarsy tura almady. Oqıǵa ornynda júrgen Ulttyq ulan jaýyngerleri men polısııa qyzmetkerleri halyqty qaýipsiz jerge kóshirýge kiristi. Osy kezde qatty aǵys bir azamatty aǵyzyp alyp ketti. Dereý kómekke umtylǵan ulandyqtar tizbektele shynjyr jasap, sýǵa ketip bara jatqan 60 jastaǵy saıajaı turǵynyn aman alyp shyqty. Qysyltaıań sátte abyrjymaı, birden alǵa umtylǵan 5517 áskerı bólim qyzmetkeri, efreıtor Nurbol Asqap pen polısııa qyzmetkeri, kishi serjant Ámirjan Birlesov bolatyn.
Nurbol Asqap sý tasqyny kezinde erekshe erligimen, eńbegimen kózge túsken azamattar qatarynda «Jaýyngerlik erligi úshin» medalimen marapattaldy. Nagradany Astanada ótken saltanatty jıynda Memleket basshysynyń qolynan aldy.
– Prezıdent Qasym-Jomart Toqaevtyń qolynan osyndaı joǵary marapat alyp, qurmetke ıe bolǵanyma qatty qýandym. Tula boıymdy maqtanysh pen qýanysh terbep, ózime ózim sene almadym. Ol sáttegi tolǵanysty sózben aıtyp jetkizý múmkin emes. Bul medal men úshin ystyq, óıtkeni Ulttyq ulan qataryndaǵy alǵashqy nagradam, – deıdi Nurbol jaýynger.
5517 áskerı bólimniń taǵy bir qyzmetkeri Máýlen Márlenov te topan sýdyń ortasynda qalyp qoıǵan júk kóligin alyp shyǵyp, 30-ǵa jýyq adamdy qutqardy. «Biz №1-2 saıajaı aýmaǵynda turǵyndardy evakýasııalap júrgen edik. Bir kezde sý ortasynda quryp qalǵan júk kóligin baıqadym. Mashına otalmaı, motory óship qalypty. Qorabynda adam toly. Sýdyń aǵysy kúsheıip, dóńgelekten asyp bara jatty. Tez arada óz kóligimmen baryp, tirkep, qaýipsiz jerge alyp shyqtym», deıdi Máýlen.
Máýlen – Almaty oblysynyń týmasy, Eńbekshiqazaq aýdany О́rikti aýlynda dúnıege kelgen. 2014 jyly Otan aldyndaǵy boryshyn óteý úshin áskerge shaqyrylyp, Oral qalasyndaǵy Ulttyq ulannyń 5517 áskerı bólimine túsken eken. Aqjaıyq topyraǵy Máýlenge qutty qonys boldy. Osy áskerı bólimde kelisimshart boıynsha jumysqa qaldy. 2019 jyly jary Maqpalmen otaý qurdy. Qazir jas shańyraqta Damır esimdi ul ósip keledi.
«Men ózimniń is-áreketimdi eshqandaı batyldyq nemese erlik dep sanaǵan emespin. Biz áskerı qyzmetkermiz ǵoı. Kez kelgen qıyn qystaý sátte halyqpen birge bolyp, kómekke ázir bolýymyz qajet. Bul – meniń kúndelikti qyzmetim», deıdi M.Márlenov.
– Bizdiń bólimniń árbir qyzmetkeri, kez kelgen jaýynger dál osylaı aıtatynyna senemin. О́ıtkeni olar – shyn máninde, Otan qorǵaýshy sarbazdar. Mereke kúni biz komandırlerimizdiń qolynan marapat alyp turyp: «Qazaqstan Respýblıkasyna qyzmet etemin!» dep saltanatty túrde málimdeımiz, – dedi Ulttyq ulan «Batys» óńirlik qolbasshylyǵy baspasóz qyzmetiniń ókili, leıtenant Baqdáýlet Manarbek.
Batys Qazaqstan oblysy
