Atalǵan aksııa ótken aptada «Jasyl aımaq» uranymen ótip, barlyq jumys kóshet otyrǵyzýǵa, aǵashtardy aqtaýǵa arnaldy. Bul ekoapta aıasynda Qarýly kúshterdiń memlekettik áskerı-tarıhı murajaıynyń aýmaǵynda túrli elshilikterdiń ókilderi jappaı aǵash otyrǵyzdy. Jańa kóshetterdiń jalpy sany 350-den asady.
«Búgin bizdiń kóńil kúıimiz keremet. Mundaı aksııalar – qorshaǵan orta úshin úlken ıgilik. О́z basym aǵash otyrǵyzý, saıabaqtardy kógaldandyrý jumystaryn ylǵı da qoldaımyn. Árbir otyrǵyzylǵan aǵash – bizdiń bolashaqqa qosqan úlesimiz, jas urpaqqa qamqorlyq. Bul baǵytta Qazaqstan aýyz toltyryp aıtarlyqtaı jumys atqaryp jatyr», dedi Belarýs Respýblıkasynyń Qazaqstandaǵy Elshiliginiń keńesshi-elshisi Dmıtrıı Zorın.
Is-sharaǵa Ázerbaıjan, Qyrǵyzstan, Tájikstan, Túrikmenstan, Indonezııa, Grýzııa, Belarýs, Portýgalııa, Taıland, Izraıl, Vatıkan elshileri men ókilderi de qatysty. «Bul is-shara «Taza Qazaqstan: Astana – tazalyq pen tártiptiń úlgisi» ekologııalyq aılyǵy aıasynda uıymdastyryldy. Oǵan qala basshylary men turǵyndary, bıznes ókilderi men jastar qatysady. Munda 350-ge jýyq aǵash otyrǵyzylady. Olardyń arasynda qaıyń, qaraǵaı, shyrsha bar. Aǵash otyrǵyzýdan basqa, biz avtomatty sýarý júıesin qatar qoıamyz. Sondaı-aq atalǵan is-shara aıasynda aýdannyń basqa saıabaqtarynda jasyl jelekter egiledi», dedi aýdan ákimi Talǵat Rahmanberdi.
Turǵyndardy birlikke bastaıtyn ekoaksııany Astanada ornalasqan 70-ke jýyq elshilik pen halyqaralyq uıym qoldady. Osylaısha, «Taza Qazaqstan: Astana – tazalyq pen tártiptiń úlgisi» ekoaksııasy úshinshi aptaǵa ulasyp otyr.Aýqymdy naýqan kezinde qalany sanıtarlyq tazartý, nóser jáne aryq káriz jelileri, kóshelerdi, trotýarlardy, oramishilik aýmaqtardy, qoǵamdyq keńistikter men aýlalardy tazalaý jumystary júrgizilip jatyr. Sondaı-aq jasyl jelekterdi kútip-baptaý jáne otyrǵyzý, saýda nysandaryna irgeles aýmaqtardy jınaý, kógaldar men gúlzarlardy tazartý, ruqsat etilmegen polıgondardy joıý jáne t.b. jumystar atqaryldy.
