Búgingi tańda elimizde kóptegen salany avtomattandyrý úderisi joǵary qarqynmen júrip jatyr. Budan densaýlyq saqtaý salasy da tys qalyp jatqan joq. Robot-kýrer – sonyń bir dáleli. Osy robot arqyly em alýshylarǵa qyzmet sapasyn jaqsartýǵa bolady. Muny ýnıversıtettiń jas ǵalymdary men robottehnıka jáne avtomatıka tehnıkalyq quraldary kafedrasynyń stýdentteri jasaǵan. Robot-kýrer aýrýhanada em alyp jatqandarǵa kerekti dári-dármekti jetkizip berýge arnalǵan. Negizinen, dári-dármekti medısına qyzmetkerleri tasýshy edi ǵoı. Endi ony robot-kýrer atqarsa tamasha emes pe?! Qazaqsha aıtqanda, robot-kýrer medısına mamandarynyń qolyn uzartady. Munda barlyq júıe avtomattandyrylyp, zamanaýı quraldarmen jabdyqtalǵan. Ásirese qurylǵydaǵy avtonomdy navıgasııanyń qyzmeti zor. Ol robottyń baǵdaryn ońtaıly etip, dári-dármekti jetkizýdi jyldamdatady. Qysqasy, robot-kýrer suranys boıynsha emdelýshige dári-dármekti ári jyldam, ári qaýipsiz jetkizedi.
Osy kómekshi qultemirdi jasaǵan toptyń jetekshisi Nurlan Baıanbaıdyń aıtýynsha, bul ıdeıa oǵan pandemııa kezinde kelipti.
«Mundaı robot-kýrer birqatar shet memlekette jaqsy damyǵan. Olar dári-dármekti pasıent jatqan árbir palataǵa qaýipsiz jetkizip beredi. Sony kózimen kórip, osyndaı robotty biz nege jasamasqa degen oı keldi. Sóıtip, birden bastap kettik. Aldymen shaǵyn robot-kýrer jasadyq. Ol oıymyzdan shyqty. Sodan keıin ýnıversıtet qoldaýymen onyń úlken nusqasyn jasap shyǵardyq. Ázirshe ony ózimiz synaqtan ótkizdik. Aldaǵy tańda osyndaı robottardy shyǵarýdy damytsaq deımiz. О́ıtkeni buǵan suranys joǵary bolary anyq. Oǵan tolyq kózim jetedi. Mysaly, Almatydaǵy №4 qalalyq aýrýhanada jumys istep júrgende osyndaı problema bar ekenin baıqadym. Biz jasaǵan robot-kýrer medısınalyq ǵımarat ishinde erkin júrip, dári-dármekti qoımadan árbir emdelýshige ózi aparady», dedi ol.
Jas ǵalymdar robotkýrerdi otandyq materıaldan jasaǵan. Elektrondyq quraldar ǵana shetelden alynǵan. Osy topqa jetekshilik etken Nurlan Baıanbaı 2018 jyldan beri kórnekti ǵalymnyń esimin ıelengen joǵary oqý ornynda qyzmet isteıdi. Sankt-Peterbýrg qalasynda magıstratýrany oqyp, Q. Sátbaev atyndaǵy Qazaq ulttyq tehnıkalyq zertteý ýnıversıtetiniń doktorantýrasyn támamdaǵan. Bıyl «Bolashaq» baǵdarlamasymen Ulybrıtanııada bilimin odan ári tereńdetýge attanyp barady. Qysqasy, ıgilikti dúnıeni jasaǵan jas ǵalymdardy qoldap, robot-kýrerdiń sanyn kóbeıtsek, medısınalyq qyzmettiń sapasy arta túseri anyq.
