Podstepnyı aýyldyq okrýginiń Iýbıleınyı aýylynda ashylǵan jańa zaýyttyń tusaýkeserine oblys ákimi Narıman Tóreǵalıev bardy. Aýyl aýmaǵynan sý kózin saraptamadan ótkizgen otandyq jáne reseılik ǵylymı zertteý ınstıtýttary bul sýdyń emdik qasıeti erekshe ekenin baıqapty. Mysaly, eresek adamnyń ortasha táýliktik qajettiligi 200-300 mkg/dm3 desek, emdik-ashanalyq sýdyń bir qutysynda 60-100 mkg/dm3 ıod bar eken. Bul sýdyń densaýlyqqa óte paıdaly ekenin kórsetedi.
«Bul – Memleket basshysynyń tapsyrmasyna sáıkes júzege asyp jatqan jobalardyń biri. О́ńirge ınvestısııa tartý, kásip aýqymyn keńeıtip, eldiń suranysyna saı qyzmet kórsetý kún tártibinen túspeıdi. Oblys kóleminde keleli jobalar qulashyn keńge jaıdy. О́tken jyldyń qorytyndysyna súıensek, ınvestısııa ákelý josparyn 16 paıyzǵa artyq oryndadyq. Al bıyl 118 mlrd teńgege 26 jobany iske qosqaly otyrmyz. Mine, sonyń ishinde «Sartay» mıneraldy taza sýymyz – tórtinshi joba», dedi óńir basshysy Narıman Tóreǵalıuly.
Oblys ákiminiń aıtýynsha, osy jyldyń sońyna deıin óńirge 700 mlrd teńgege jýyq ınvestısııa tartylady eken. Árıne, osy arqyly jańa jumys oryndary ashylyp, tabys molaıa túspek.
«Batysminiralsu» zaýytynda 60 adam jumys isteıdi. Qurylys kezinde 30 adam jumysqa tartylǵan. Osylaısha, qazirdiń ózinde alaqandaı aýyldaǵy bir ǵana zaýyt 90 adamdy jumyspen qamtyǵan.
Zaýyttyń ashylý saltanatyna Terekti aýdanynyń ákimi Álııa Muhanbetjanova, osy jobany qarjylandyrýǵa atsalysqan «ForteBank» ókilderi qatysyp, sáttilik tiledi. Jańa kásiporynnyń esigine kerilgen baýdy oblys ákimi Narıman Tóreǵalıev pen zaýyttyń bas dırektory Álisher Ońtalapuly qıdy.
Quny 1,5 mlrd teńgeni quraıtyn joba óniminiń ataýy belgili bı jáne batyr Sartaı Baıjanulynyń esimine baılanysty qoıylǵan eken. 1711-1785 jyldary ómir súrgen, 15 jasynda qol bastap, jaýǵa toıtarys bergen tarıhı tulǵa jóninde rejısser Aqan Sataev «Jaýjúrek myń bala» atty fılm de túsirgen bolatyn. Aıtpaqshy, Sartaı batyrdyń ashamaıy Batys Qazaqstan oblystyq tarıhı-ólketaný mýzeıinde saqtaýly tur.
Batys Qazaqstan oblysy
