foto: ortcom.kz
DDU-nyń 2020–2025 jyldarǵa arnalǵan eýropalyq jumys baǵdarlamasy sheńberinde qoǵamdyq densaýlyq saqtaý salasyndaǵy mamandardyń tájirıbe almasýy – mańyzdy oqıǵa. Ásirese Eýropa qurlyǵyndaǵy elderdiń, Ortalyq Azııa men TMD-nyń qarýly qaqtyǵystar, halyqtyń qozǵalysy, klımattyń ózgerýi, shamadan tys ýrbanızasııa, energetıkalyq daǵdarys, áleýmettik-ekonomıkalyq teńsizdik, jalǵan aqparat taratý, medısına qyzmetkerleriniń fızıkalyq jáne psıhıkalyq sharshaýy syndy túıtkildi tarqatý úshin de qajet. Álemdi alańdatqan jańa indettiń paıda bolýy jáne jer júzin jaılaǵan juqpaly aýrýlardyń qaıta údep, taralýy da ǵalamnyń alańyn týdyryp otyr.
«COVID-19 pandemııasy halyqaralyq yntymaqtastyq pen qoǵamdyq densaýlyq saqtaý salasyndaǵy bilikti mamandardy daıarlaýdyń mańyzdylyǵyn aıqyn kórsetti. Bul kýrsqa qatysýshylar álemdik tájirıbemen tanysyp qana qoımaı, halyqaralyq deńgeıde qoǵamdyq densaýlyq saqtaý mamandarynyń ınnovasııalyq jelisin qurýǵa yqpal etý múmkindigin ıelenedi», dedi Densaýlyq saqtaý vıse-mınıstri Erbol Ospanov.
«Sońǵy onjyldyqtarda álemde kóptegen qym-qıǵash qıyndyqtar boldy. Densaýlyqtyń ekologııalyq turaqtylyqpen jáne áleýmettik ózgeristermen baılanysy nyǵaısa, tıimdi kóshbasshylyqtyń mańyzy artady. Kýrs barysynda birneshe mańyzdy taqyryptar, sonyń ishinde jahandyq jáne óńirlik deńgeılerdegi qoǵamdyq densaýlyq saqtaý máseleleri, olardyń sebepteri men sheshimderi, sondaı-aq vedomstvoaralyq yntymaqtastyq ta talqylandy», dedi DDU-nyń Qazaqstandaǵy ókili, doktor Skender Syla.
Astanadaǵy kýrstar baǵdarlamasy basqarý jáne strategııalyq josparlaý daǵdylaryn damytýǵa baǵyttaldy. Qatysýshylar qarqyndy oqytý men tájirıbe almasý arqyly da densaýlyq saqtaýǵa tónetin syn-qaterlerge tosqaýyl qoıýdyń múmkindigin talqylady.
