2018 jyly qurylǵan, aýmaǵy 145 myń gektardy quraıtyn ulttyq parkte 1 640 túrli ósimdik ósedi. Olardyń ishinde 169 endemııalyq túri bolsa, 35 túri Qazaqstannyń «Qyzyl kitabyna» engen.
Taıaýda Astana halyqaralyq ýnıversıtetiniń bastamasymen «Tarbaǵataı» memlekettik ulttyq tabıǵı parkinde doktoranttardyń dıssertasııalyq jumys taqyryptary men ǵylymı jobalary negizinde dalalyq ǵylymı zertteý jumystary júrgizilip, basqosýǵa Qazaqstannyń bıolog ǵalymdarymen qatar Polsha, Izraıl, Japonııa elderiniń ǵalymdary keldi.
Shetelderde ǵylymı taǵylymdamadan ótip, ǵalymdarmen tyǵyz baılanys ornatqan zertteýshiler jańa tynys tapqan. Al atalǵan parkke kelgen Polsha, Izraıl, Japonııa elderiniń ǵalymdary ulttyq park aýmaǵyndaǵy ósimdikterdiń ósý jıiligi men florasyn zertteýde úlken jańalyqtarǵa kenelerine zor senim bildirgen eken.
«Tarbaǵataı» memlekettik ulttyq tabıǵı parki men Astana halyqaralyq ýnıversıteti arasyndaǵy memorandým sheńberinde oryndalyp jatqan atalǵan zertteý nátıjesi aldaǵy ýaqytta álemdik deńgeıdegi ósimdikter men janýarlar áleminen habar beretin jýrnaldarda, ǵylymı eńbekterde jarııaǵa shyqpaq.
Qazaqstannyń «Qyzyl kitabyna» engen erekshe tirshiliktiń joıylyp ketý qaýpimen kúresýge baǵyttalǵan ekspedısııalar – Tarbaǵataı taýyndaǵy ózge de tirshilik ıelerine álem ǵalymdarynyń nazaryn burý maqsatyn kózdeıdi.
Bul týraly tolyǵyraq «Egemen Qazaqstan» gazetiniń búgingi sanyna shyqqan Qýat Qıyqbaıdyń «О́zgeshe ósimdikter álemi» maqalasynan oqı alasyz.
