Oblys ákimdigi jumyspen qamtýdy úılestirý jáne áleýmettik baǵdarlamalar basqarmasynyń muryndyq bolýymen, ardagerler keńesiniń qoldaý kórsetýimen jambyldyq óner ujymdary da bul baıqaýda baq synaý múmkindigine ıe boldy. Osylaısha, «Ǵumyrdarııa» ult aspaptar ansambli bastap, «Áýlıeta» óner ujymy qoshtap, aıyr qalpaqty aǵaıyndardyń elindegi óner merekesinde baq synady.
О́nerpazdardyń shyǵarmashylyq múmkindikterin ashyp, óz eliniń mádenıetin halyqaralyq deńgeıde tanytyp, rýhyn kóterý maqsatynda ótkizilgen aýqymdy is-sharada Túrkııa, Rýmynııa, Úndistan, Qyrǵyz Respýblıkasy, Qazaqstan syndy memleketterden bas-aıaǵy 18 top óner kórsetti.
Baıqaý sharty boıynsha dodaǵa jasy 35-ten joǵary ónerpazdar qatysýǵa tıis bolsa, jambyldyq ónerli ardagerler ónerimen ǵana emes, jasymen de ózgelerinen oq boıy ozyq turdy. Belsendi ómirmen birge ónerin óristetip júrgen qarııalarymyz aspaptyq oryndaý, horeografııa, vokaldyq óner, kórkemsóz oqý syndy birneshe atalym boıynsha synǵa tústi.
Jambyldyq ónerpazdar atalǵan bólimderdiń barlyǵyna derlik úlken daıyndyqpen kelip, jeńis tuǵyrynan kórinýge tyrysty. О́mir men ónerin ushtastyra bilgen ónegeli ardagerlerimiz á degennen-aq jurttyń ystyq yqylasynan bólek, qazylardyń nazaryn ózderine aýdardy. Uly Abaıdyń «Kózimniń qarasy» ánin eki tilde oryndaǵan qarııalardan quralǵan tórttik júldeli I oryndy ıelenip, Rýmynııa memleketinde ótetin iri baıqaýǵa joldama utyp alsa, «Altyn jas» bıshiler tobynyń oryndaýyndaǵy bı kópshiliktiń kóńilinen shyqty. Ujymǵa ekinshi oryn buıyrdy.
Tarazdan barǵan Sydyqnazar Qarjaýbaı «Shalqymaly», «Dúnıe-aı» ánderimen tyńdarman qaýymdy tánti etse, Amanqul Ysqaqov jeke bı oryndaýynda qazaqtyń ulttyq bıi «Qarajorǵany» bılep, ózbek ultynyń «Ándijan polkasyn» oryndaýda sheberlik tanytty.
Uıymdastyrýshy taraptyń tilegine sáıkes baıqaýǵa qatysýshylardyń sahnalyq sheberligi de nazardan tys qalmaǵanyn aıta ketken lázim. «Ǵumyrdarııa» ulttyq aspaptyq ansambli men «Áýlıeata» ardagerler ansambliniń óneri men sahnalyq obrazdary joǵary baǵalanyp júldeli oryndardan kórindi.
Poezııa atalymy boıynsha ótken baıqaý da kóptiń kóńilinen shyqty. Sondaı-aq Marat Baıdalıev, Hanymkúl Besinbaı, Záýre Jumabaeva bastaǵan ónerpazdar kórkemsóz oqýdyń úzdik úlgisin kórsetip, qoshemetke bólendi.
Halyqaralyq baıqaý sońynda júldeli oryndardan kóringen qatysýshylar aldaǵy ýaqytta Túrkııa, Rýmynııa elderinde ótetin óner dodalaryna joldama alsa, basqa ónerpazdar alǵys hattarmen marapattaldy. Baıqaý barysynda «Belsendi uzaq ómir» ortalyǵynyń músheleri belsendilik tanytqanyn da aıta ketken jón.
Jambyl oblysy
