Sýretti túsirgen – Erlan OMAR, «EQ»
Mádenıet jáne aqparat mınıstrligi «Ulttyq volonterler jelisi» ZTB-men birlesip, 9–14 shilde aralyǵynda ekologııa aptalyǵyn ótkizýdi qolǵa aldy. Joba eriktiler men qoǵamdyq uıymdardyń atsalysýymen ótedi. Qazir joba aıasynda elimizdiń barlyq óńirinde ekologııalyq aptalyq ártúrli taqyrypta jalǵasyp jatyr. «Igi ister marafony» – kúntizbedegi mańyzdy datalarǵa, halyqaralyq jáne túrli áleýmettik mádenı taqyryptarǵa arnalǵan «Izgilik aptasyn» dástúrge aınaldyrýǵa josparlanǵan.
«Mundaı ıgi isterge arnalǵan aptalyqtyń ataýy jyl saıyn ózgerip otyrady. Bul áleýmettik jaýapkershiliktiń túrli salasyna qyzyǵýshylyqty arttyra otyryp, ózekti máselelerdiń alýan túrliligi men keń aýqymyn qamtıdy. «Igi ister marafonynyń» osy aptasy ekologııaǵa arnalady. Jobaǵa qatysý úshin jasaǵan ıgi is týraly áleýmettik jelilerde aqparat jarııalap, Qazvolunteer.kz onlaın platformasynda tirkeýden ótý qajet», deıdi uıymdastyrýshylar.
Marafon qorytyndysy boıynsha eń belsendi qatysýshylar marapattalady. Rasynda, bul birrettik naýqan emes, halyq mádenı sanasyn qalyptastyratyn kreatıvti ıdeıa. Ásirese bul bastamanyń qoǵamǵa, qorshaǵan ortaǵa degen úlken qamqorlyq ekenin túsinýge bolady.
