Kezdesý beıresmı jaǵdaıda ótti. Sharanyń tizginin de oqýshylar óz qoldaryna aldy. Jas fızıkter, matematıkter, ınformatıkter, arhıtektorlar, sýretshiler, ekologtar men sportshylar elorda basshysyna ózderiniń tabystary men jetistikteri jaıynda áńgimelep, bolashaq josparlarymen bólisti.
№6 gımnazııanyń oqýshysy, Ońtústik Koreıada ótken «Jas ǵalym» ǵylymı jobalar konkýrsynyń Gran-prı ıegeri, «Úzdik ınnovasııalyq eńbek» syılyǵynyń ıegeri Aıda Umyrbekova óziniń «Ekoqala» jobasyn tanystyrdy. «Astana – meniń qalam! Men onyń eń ásem, taza, jaınaǵan qala bolǵanyn qalaımyn. Meniń jobam «Ekoqala» dep atalady. Onda men energııany jelden jáne kúnnen alý joldaryn qoldandym», – dedi ol.
№6 gımnazııanyń oqýshysy, geografııadan Respýblıkalyq olımpıadanyń jáne ǵylymı jobalar konkýrsynyń júldegeri Ánýar Ábdirahmanov óziniń «Biryńǵaı Energo-aqparattyq júıesi» zertteýin tanystyrdy. Al №66 mektep-lıseıdiń oqýshysy, «Altyn mıkrofon» (Fransııa) Halyqaralyq konkýrsynyń Gran-prı ıegeri Danııa Ishanqulova ulttyq jetigen aspabynda popýrrı oryndap berdi. Geografııadan Respýblıkalyq oqýshylar olımpıadasynyń jeńimpazy, QR quramasynyń múshesi Artem Rychko Ádilbek Jaqsybekovten ózimen birge selfıge túsýge ruqsat surap, sol úshin «dostarymen básteskenin aıtty». Artem bul báste jeńdi. Ákim qyzyqqa toly kezdesý úshin balalarǵa alǵysyn bildirip, olardyń kóptegen suraqtaryna jaýap berdi. Jáne sportpen, dene shynyqtyrýmen shuǵyldaný – olardyń densaýlyǵy men bolashaǵyna áseri mol bolatynyn esterine saldy.
Qala ákimi jas jeńimpazdardy qol jetkizgen nátıjemen shektelmeı, odan ári alǵa basýǵa shaqyrdy. – Bizdiń jastardyń arasynda Bıll Geıts sııaqty ınnovatorlar, Abaı Qunanbaıuly sııaqty fılosoftar, Qanysh Sátbaev sııaqty ǵalymdar, Muhtar Áýezov sııaqty jazýshylar júrýi ábden múmkin. Senderdiń oqyp, bilim alýlaryń úshin, jetilip, damýlaryń úshin barlyq múmkindikter jasalyp jatyr.
Elbasynyń tapsyrmasyna sáıkes biregeı Oqýshylar saraıy salyndy, bilim berý granttarynyń sany artty, shákirtaqynyń kólemi ulǵaıdy, álemdik deńgeıdegi ýnıversıtet boı kóterdi, ıntellektýaldy mektepter salyndy, «Bolashaq» baǵdarlamasy qabyldandy, bul baǵytta áli de qyrýar jumystar júrgizile beretin bolady. Sender bizdiń elordanyń jarqyn ókilisińder, El sendermen maqtanýy kerek. Búgingi tańda 67 myńnan astam astanalyq oqýshylar túrli deńgeıdegi ǵylymı-shyǵarmashylyq saıystar men olımpıadalarǵa qatysýda. Astana qalasynyń oqýshylarynan quralǵan top 7 jyl qatarynan birinshi oryndar men ataqtarǵa ıe bolyp keledi. Oǵan qosa, jaqynda ótken O.Jáýtikov atyndaǵy halyqaralyq olımpıadada bizdiń balalar matematıka men fızıkadan, ınformatıkadan júldeli oryndarǵa ıe boldy. Senderdiń bolashaqtaryńnyń jarqyn bolýy – bul qalamyzdyń, tutas elimizdiń jarqyn bolashaǵynyń kepili, – dedi kezdesý qorytyndysynda qala ákimi.
«Egemen-aqparat».
