foto: ©mosaic-lille.fr
Aslanbek – jazǵy Olımpıada oıyndarynda elimizdiń delegasııasyn bastap shyǵatyn, ıaǵnı tý ustaýshy úshinshi boksshy. Buǵan deıin kók baıraǵymyzdy qaı boksshylar ustady degen saýalǵa toqtalýdy jón sanadyq.
Qazaqstan sportshylary táýelsiz eldiń atynan jazǵy Olımpıada oıyndaryna 1996 jyly qatysty. AQSh-tyń Atlanta qalasyn dúbirge bólegen aıtýly alamannyń ashylý saltanatynda Ermahan Ibraıymov tý ustap shyqty. 71 kg salmaq dárejesinde dodaǵa kirgen boksshy jartylaı fınalda kýbalyq Alfredo Dýverhelge ese jiberip, qola medaldy qanaǵat tutty. Tórt jyldan keıin Aýstralııanyń Sıdneı qalasynda alaýy tutanǵan jazǵy Olımpıadanyń saltanatty rásiminde de bizdiń sportshylardy Ermahan Ibraıymov bastap júrdi. Tý kótergen sańlaq shırek fınalda tórt dúrkin álem chempıony, jazǵy Olımpıada oıyndarynda eki márte kúmis medal ıelengen kýbalyq boksshy Hýan Ernandesti aıqyn utty. Jartylaı fınalda brıtandyq Djerman Teılordy yǵystyryp, fınaldyq tartysta álem chempıony rýmyn Marııan Sımonnan basym túsip, Olımpıada chempıony atandy. Odan keıingi jazǵy Olımpıada oıyndarynda elimizdiń delegasııasyn bastap, tý ustap shyǵý qurmeti boksshylarymyzǵa buıyrǵan joq. Tek 2021 jyly ótken Tokıo jazǵy Olımpıadasynda boksshy Qamshybek Qońqabaev pen jeńil atlet Olga Rypakova kóshti bastap tý alyp júrdi. Qamshybek Tokıo jazǵy Olımpıadasynyń jartylaı fınalynda amerıkalyq Rıchard Torreske ese jiberip, qola medaldy qanaǵat tutty.
Aslanbek Parıj rınginde atoı sala ma? Byltyr Tashkentte álem chempıony atandy. On jyl buryn 20 jasynda eresekter arasyndaǵy dodada top jaryp kózge túsken sańlaqqa Olımpıadanyń joldamasy 30 jasqa tolǵansha jalynan ustatqan joq. Orda buzar shaǵynda Olımpıada dýyna qosylatyn boksshy úshin ázirge alynbas qamal – japon Sevon Okadzava. Byltyr Qytaıdyń Hanchjoý qalasynda ótken jazǵy Azııa oıyndarynyń jartylaı fınaldyq básekesinde Shymbergenov osy Okadzavaǵa ese jibergen edi.
