Kanada kórermenderin tamsandyrdy

Kórkemdik deńgeıiniń joǵary bo­lýyna baılanysty kanadalyq kórer­men nazaryna usynylǵan bul qoıy­­lym memleket astanasynyń or­talyǵyn­­­da ornalasqan Ottava Ýnı­ver­sı­te­ti­niń «Academic Hall» sahnasynda ­3-4 shilde kúnderi sahnalan­dy. Ka­nada kórermenderine dúnıejúzi­niń qýyrshaq ónerin tanysty­ryp, halyqaralyq shyǵarmashylyq pen yntymaqtastyqty kózdegen mádenı is-sharaǵa elimizdiń kók týyn ustap qatysqan alǵashqy qazaqstandyq óner ordasy Almaty Memlekettik qýyrshaq teatry boldy. Almaty teatrynyń shyǵarmashylyq ujymy festıval aıasynda kanadalyq kórermenderdiń nazaryna óz repertýaryndaǵy erekshe qoıylymdardyń biri, aǵylshyn dra­matýrgi Ýılıam Shekspırdiń áıgili tragedııasy jelisimen sahnalanǵan, názik te taza mahabbattyń qudiretin sezdiretin «Romeo men Djýletta» spektaklin usyndy. Kanadalyq azamattar da, osy elde turyp jatqan otandastarymyz ben qandastarymyz da spektakldi tamashalap, qoıylym sońynan zor qoshemeti men jyly lebizin jarysa bildirip jatty.

Qýyrshaq teatrynyń reper­týa­ryn­daǵy «Romeo men Djýletta» spek­takli 2019 jyly belgili rejıs­ser Dına Jumabaevanyń jetek­shi­ligi­men sahnaǵa jol tartqan edi. Eresekterge arnalǵan bul qoıy­lym premerasy ótkizilgen kún­nen bas­tap óziniń erekshe qýyrshaq­ta­ry­men jáne tyń sahnalyq sheshimderimen kórermender men teatr synshylarynyń joǵary baǵasyn ıelengen edi. Birtalaı halyqaralyq jáne res­pýb­lıkalyq deńgeıdegi teatr festı­val­derinde de baq synaǵan bul qoıy­lym qýyrshaq teatrynyń abyro­ıyn asqaqtatyp keledi. Mysaly, 2022 jyly «Romeo men Djýletta» Bol­garııanyń Varna qalasynda ót­ken ha­lyq­aralyq «Altyn delfın» qýyr­shaq teatrlar festıvalinde úzdik dep tanylyp «Gran-prı» júldesine, «Eń úzdik er adam» júldesine, «Eń úzdik debıýt» júldesine laıyqty bolǵan. Al oǵan deıin 2021 jyly Qaraǵan­dy qalasynda ótkizilgen jáne kóbine otandyq dramalyq teatr ujymdary qatysqan Áshirbek Syǵaı atynda­ǵy «Syn – shyn bolsyn» respýblıka­lyq teatrlar festıvalinde I-oryndy je­ńip alǵan. Sonymen qatar «Romeo men Djýlettanyń» ózge de festıvalderde ıelengen jetistikteri men jeńisteriniń ózi bir shoǵyr.

Qazaqstan Respýblıkasynyń ­Ka­na­dadaǵy Tótenshe jáne ókiletti elshisi Dáýletbek Qusaıynov fes­tıval aıasynda qýyrshaq teatryna qoldaý bildirip, «Romeo men Djý­letta» spektaklin tamashalap: «Bizdiń jastarymyz óte joǵary deńgeıde óner kórsetti jáne óte qyzyq mahabbat hıkaıasyn baıandap berdi. О́z darynyn, jalpy qazaq jastaryna tán talantty Kanada halqyna tanystyrdy», – dep baǵalap ótti.

Al Kanadanyń Qazaqstan Respýb­lıka­syndaǵy Tótenshe jáne óki­letti elshisi Alan Hamson bolsa: «Artıs­ter­diń tamasha ónerine kýá boldym. «Romeo men Djýlettanyń» osy bir ın­terpretasııasy bizdi qatty tańǵal­dyrdy!» – dep pikir bildirdi.

Festıval sońynda Almaty Mem­lekettik qýyrshaq teatrynyń «Romeo men Djýletta» spektakli eń úzdik ári jańalyǵy mol qoıylym retinde tanylyp, «Gran-prı» júldesine ıe boldy. I Halyqaralyq «Ottava» qýyrshaq teatrlar festıvali aıasynda qýyr­shaq teatrynyń ártisteri qazaq qýyr­shaq óneriniń, qazaq teatry­ óneriniń, jal­py qazaq halqynyń ónerliligin sahna tórinde asqaqtatyp, zor tabysqa keneldi.