О́ziniń aıtýynsha, bala kezinen mýzykalyq aspaptarda oınaýǵa qyzyqqan eken. Ákesi ulynyń ónerli bolǵanyn qalap, yntasyn oıatqan. Oblys ortalyǵynan shalǵaı ornalasqan Qyzylqoǵa aýdanynyń Jasqaırat aýlyndaǵy mektep, klýb sahnasynda án aıtyp, dombyra shertken ulynyń ónerin ushtaýdy kózdep, Atyraý qalasyna qonys aýdarǵan.
«Munaıly shahardaǵy N.Tilendıev atyndaǵy daryndy balalarǵa arnalǵan akademııada vokal, pıanıno synybynda oqydym. Joǵary bilimdi H.Dosmuhamedov atyndaǵy Atyraý memlekettik ýnıversıtetiniń óner fakýltetinen alyp shyqtym. Biraq bilimimdi jetildirýdi kózdep, Qurmanǵazy atyndaǵy qazaq ulttyq konservatorııasynda akademııalyq utqyrlyq baǵdarlamasymen oqýymdy jalǵastyrdym», deıdi A.Sıǵýatollauly.
«Jigitke jeti óner de az...» deıtin támsildi ustanatyn ónerpaz stýdenttik kezeńin tekke ótkizgen joq. Mýzykalyq aspaptardyń birinen soń birinde oınaýdy meńgerdi. Ár aspaptyń tarıhyn, jasalý jolyn jetik biledi. Qazir jıyrma túrli aspapta erkin oınaıdy. Qazaqtyń ulttyq murasy – dombyranyń qos isheginen kúmbirlete kúı tógedi. Qylqobyzben Qorqyt dáýirinen jetken uly dala sazyn syzyltady. Syrnaımen syrly áýenderdi áýeletedi. Pıanınomen klassıkalyq mýzykalardy naqyshyna keltire oryndaıdy. Gıtara, baıan, taǵysyn taǵy.
«Alǵashqyda dombyra tartýdy úırengen edim. Biraq tek bir aspappen shektelgim kelmedi. О́ner jolyn tańdaǵan soń birneshe aspapta oınaǵandy jón kórdim. Sol maqsatyma jaqyndap kelemin. О́ıtkeni áli de birneshe aspapta oınaýdy kózdep júrmin», deıdi A.Sıǵýatollauly.
Kez kelgen aspapty qolyna alsa, on saýsaǵynan saz tógiletin ónerli jigit D.Nurpeıisova atyndaǵy akademııalyq qazaq halyq aspaptar orkestri janyndaǵy «Sarmad» etno-folklorlyq ansamblinde jumys isteıdi. Sonymen birge DD RECORDS tobynyń quramynda óner kórsetip júr.
Atyraý oblysy
