Qalanyń Qazanbaev kóshesindegi Álipbaı men Aınurdyń úıin sol mańdaǵylar jaqsy biledi eken. Kóp qınala qoımadyq. Biz kesh estip qalǵan tárizdimiz, áıtpese, bulardyń eshki ósire bastaǵanyna bıyl besinshi jylǵa aıaq basypty. Álipbaıdyń aıtýynsha, «Bárin bastaǵan Aınur» eken.
Olar 2002 jyly shańyraq kóteripti. Aınur Jáırem kentiniń, al Álipbaı Baıqońyr aýylynyń týmalary. Aınur Jezqazǵan ýnıversıtetin ekonomıst-menedjer mamandyǵy boıynsha bitirgen bolsa, Álipbaı – ken óndirisiniń mamany. Ekeýi Jezqazǵanda tanysyp, kóńilderi uǵysyp, júrekteri jarasym tapqan. Qazir olar 3 qyz, 2 ul ósirip otyr. Bala-shaǵasy týraly aıtyp otyrǵanymyz beker emes. О́ıtkeni áke-shesheleriniń eshki «bıznesimen» aınalysýlaryna olardyń da janama bolsa da áseri tıgen. Qalaı?
2017 jyly Aınur bala kútimine baılanysty eńbek demalysyna shyqty. Sanıtarlyq-epıdemıologııalyq stansada jumys isteıtin edi. Arada úsh jyl ótken soń, jumysqa qaıtadan qosylý qajet. Memlekettik mekemeniń jalaqysy shamaly ǵoı. Aınur kásipker bolyp ta kórgisi keldi. «Úıde qarap otyrǵanym bolmas» degen ol «Kásipkerlikke oqytý» kýrsyna jazyldy. Biletini – bireý, bilmeıtini – toqsan toǵyz eken. «Qandaı kásip tıimdi bolmaq?». Oıyna qaıynatasynyń «bir-eki eshki bir otbasyn asyraıdy», dep aıtatyny esine túse ketti. «Shynymen de solaı ma eken?». Buǵan kóz jetkizýdiń esh qıyndyǵy joq. Áleýjeli arqyly «eshki sútin satamyn» degen habarlandyrý berdi. Al sodan soń ne boldy deısiz ǵoı?! Adamdar birinen soń biri habarlasa bastaǵanda ol qaıda qashyp tyǵylaryn bile almaı qaldy. «Sút ótip ketti» degen jaltarma jaýappen qutyldy.
«E, ata bilgesin aıtyp júr eken ǵoı» degen Aınur eshki ósirýge myqtap nıettendi. Eshki negizi etti, túbitti jáne sútti bolyp úshke bólinedi. Aınur «Bıznes–jospar» jazyp, utyp alǵan 555 myń teńge grantqa sútti baǵyttaǵy asyl tuqymdy eshki satyp alýdy oılady. Qyzyq bolǵanda, mundaı eshki satatyn Jezqazǵan tóńireginde jalǵyz-aq kisi bar bolyp shyqty. Ol muny ózine básekeles bolady dedi me eken, áni-mine dep, «satamyn» degen eshkisin sata qoımaı, birtalaıǵa deıin sońynan júgirtip qoıdy. Aqyry, qoıarda qoımaı júrip, sol kisiden bir eshki, úsh laq satyp aldy.
Berile kirisken is nátıjege jetkizbeı qoımaıdy eken. Aınurdyń eshki saýyp, sútin sata bastaǵany kórshi-kólem arqyly kópshilikke jaıyldy. Suranys kóp, oryndaýǵa múmkindik bolmaǵan soń, «Siz búgin, al siz – erteń kelińiz» degendeı adamdardy kezekke qoıatyn tártip engizdi. Endi qaıtsin?!
– Meniń eń kishkentaı «klıentim» – eki aılyq búldirshin boldy. Anasynyń súti qaıtyp ketip, bópesin eki jyl boıy meniń eshkilerimniń sútimen asyrap ósirdi. «Sizdiń eshkińizdiń sútiniń nári me eken, balamyz shıraq bolyp ósip keledi», deıdi onyń ata-anasy. Shynynda, eshki súti dárýmenderge keremet baı ǵoı, bul ǵylymda dáleldengen, – degen Aınur sóz arasynda sút satý arqyly tek tabys tabýdy ǵana kózdemeıtinin, adamdarǵa jaqsylyq nuryn sebelep júrgenin de sezdirip qoıdy.
Eshkiniń sútinen aıran uıytýǵa da, irimshik isteýge de bolady eken. Árıne, mundaı ónim túrlerin óndirý úshin Aınurdyń múmkindigi az. О́ıtkeni saýǵan súti artyla qoımaıdy.
Ol eshkileriniń árqaısysyna at qoıypty. Saýatyn kezde qaısysynyń atyn ataıdy, sol Aınurdyń aldyna kelip tura qalady eken. Ǵajap qoı! «Bular osynshalyq aqyldy bolady dep oılamappyn», deıdi ol.
Qalaly jerdegi bir qıynshylyq jaıylym máselesi. Tańerteńgilik jáne keshkilik birer saǵat balalary syrtqa shyǵaryp, jaıyp keledi. Qolǵa úırengenderi mundaı ońdy bolar ma, eger kim jaıýǵa shyqsa, sol adam kózderinen tasa bola qalsa, eshkiler ózderi sony izdep, mańyrap mazalary qashady desedi. Iаǵnı tastan tasqa sekirip betaldy jaıylyp, joǵalyp ketpeıdi eken. Bul da bir olardyń ózindik erekshelikteri tárizdi.
Aınurdyń qaıynatasy Qaısar Jumabaıuly Ulytaý aýdanynyń «Baıqońyr» aýylynda turady. Seksenniń segizine qaraǵan aqsaqal áli kúnge deıin eshkini ózi saýatyn kórinedi. Álipbaı ákesiniń shıraq qımyly «bala kezinen eshki sútin ishýine baılanysty», dep paıymdaıdy.
Qazir Álipbaı men Aınurdyń qoldarynda alpi, zaanen jáne nýbı tuqymdary bolyp tabylatyn 5 saýyn eshki jáne solardyń 11 laǵy bar.
– Urǵashy laqtardy ósirýge qaldyramyz da, erkekterin kóje-qatyqqa paıdalanamyz. Senesiz be, ózimiz ósirgesin soıýǵa da qımaıdy ekensiń. Ásirese balalar soıdyrmaıdy. Sosyn basqalarmen aıyrbastaımyz, – degen Álipbaıdyń sózinen mal ósirý adamdy meıirbandyqqa da baýlıtynyn túsingendeı boldyq. Jomart kenishinde untaqtaýshy bolyp isteıtin Álipbaı jumysty vahtalyq ádispen isteıdi. Iаǵnı on bes kún jumysta júredi. Vahtadan kelgen soń Aınurdyń eshki sharýashylyǵyna kómektesedi. О́ziniń negizgi qyzmetine qosa osy isti dóńgeletip, adal kásippen aınalysyp, qosymsha tabys taýyp otyrǵan Aınur Izbasovanyń isi árkimge de úlgi bolǵandaı-aq emes pe?
Ulytaý oblysy
