Memlekettik qyzmet jetildiriledi

Keshe Memlekettik qyzmet isteri jáne sybaılas jem­qorlyqqa qarsy is-qımyl agenttiginiń uıymdastyrýymen memlekettik qyzmetti jetildirý máseleleri boıynsha dóńgelek ústel bolyp ótti. Atalǵan sharaǵa Parlament depýtattary, birqatar oblystardyń ákimderi, Prezıdent Ákimshiliginiń, Premer-Mınıstr Keńsesiniń ókilderi, mınıstrlikterdiń jaýapty hatshylary men aımaq ákimderiniń apparat basshylary qatysty. «Qıyndatylǵan testileýdiń tasasynda kóptegen tájirıbeli mamandardyń nebári 1-2 ball jınaı almaı qalýy jıi kezdesedi. Sol sebepti, testileý barysynda ózgerister men ondaǵy kandıdattardy irikteý kezinde jańa jaǵdaılar qarastyrý kerek bolyp otyr», degen agenttik tóraǵasy Qaırat Qojamjarov  olardyń tarapynan «A» basqarýshylyq korpýsyna irikteý tártibin jetildirý usynylatynyn aıtty. Dóńgelek ústelde memlekettik qyzmet personalyn basqarýdyń ózekti máseleleri, «A» basqarýshy korpýsyn testileýdi jáne olardy irikteý sharttaryn odan ári jetildirý, sondaı-aq, memlekettik apparatty kásibılendirý men memlekettik qyzmet kórsetý týraly, basqa da máseleler sóz boldy. Prezıdent Ákimshiligi Basshysynyń orynbasary  Ǵa­bıdolla Ábdirahymov «Elbasy Nursultan Nazarbaev táýelsizdik alǵaly beri  memlekettik qyzmet ınstıtýtyna, memlekettik basqarý júıesine erekshe nazar aýdaryp keledi», deı kele, 2030, 2050 jyldarǵa deıingi damý strategııalary kásibı úkimet qurýda, memlekettik qyzmet salasyn jetildirý isinde mańyzdy ról atqaratynyn atap ótti. Sondaı-aq, ol Elbasynyń syndarly saıasatynyń arqasynda atalǵan  máselelerde kóptegen tyń ózge­rister bolǵanyna toqtaldy.  Biz postkeńestik elder ishinde alǵash bolyp memlekettik qyzmet týraly zańdy, sybaılas jemqorlyqqa qarsy zańdy qabyldadyq.  Qa­zaqstan jetistikterin búginde búkil álem moıyndaıdy, dedi Ǵ.Ábdirahymov. Al Q.Qojamjarov basty nazardy merıtokratııa qaǵıdasyn buljytpaı oryndaý arqyly talanttardy basqarý men mansaptyq josparlaý sekildi máselelerge aýdara kelip, kadrlardy irikteý men ilgeriletýdiń zamanaýı tehnologııalary men tetikterin engizýdiń kómegimen memlekettik qyzmettiń modelin jetildirýge bolatyndyǵyn atap kórsetti. О́ńirlerdiń ókilderi kadrlardy irikteý men joǵarylatý máselesi boıynsha birqatar usynystaryn jetkizdi, onyń ishinde, oblystyq jáne aýdandyq deńgeılerdegi aýystyrýlar arqyly kadr tapshylyǵyn sheshýge bolatynyna qatysty máseleler qozǵaldy. Memlekettik qyzmet sala­syndaǵy basqarýshy óńirlik habtyń basshysy Álıhan Baımenov dóńgelek ústel barysynda aıtylatyn taqyryptardyń memlekettik qyzmetti jetildirýde mańyzdy ekendigin atap ótti. Sondaı-aq, ol mazmuny óte kúrdeli bolyp tabylatyn memlekettik qyzmet máselesin  talqylaýda osyndaı alqaly jıyn uıymdastyrý salany jetildirýge oń yqpalyn tıgizetini sózsiz ekenin atap kórsetti. Elimiz memlekettik qyzmetti jetildirý baǵytynda aımaqta kóshbasshy sanalady. Kórshi elder bizdiń modelimiz ben zańdarymyzdy zerdeleýde jáne óz sheshimderinde paıdalanýda. Degenmen, ómir bul salany odan ári jetildirýdi qajet etip otyr, deı kele,  Á.Baımenov elimizdegi memlekettik qyzmettiń jańa modeli eń ozyq tájirıbege saı bolǵanymen, jańa sheshimderdi izdeý de kerektigin kóldeneń tartty. Parlament depýtattary óz­deriniń sózderinde «A» bas­qarý­shy korpýsy kadr rezerviniń quramyn jasaqtaýdyń tetikterin jetildirýge nazar aýdardy. Atalǵan máselege baılanys­ty naqty usynystar engizildi. Budan basqa, dóńgelek ústelge qatysýshylar konkýrstyq irikteý úderisterin úmitkerlerdiń tek zańnamany bilgendigimen ǵana emes, sonymen qatar, kásibı jáne iskerlik qyrlary arqyly da baǵalaý qajettigin atap kórsetti. Elmıra MÁTIBAEVA, «Egemen Qazaqstan».