Jaqynda ǵana oblys ortalyǵyndaǵy «Murager» mektebiniń 4-synyp oqýshysy Aısultan Husaıyn tereńge shym batyp bara jatqan eki jasar balany qutqaryp, erlik tanytty.
«Sol kúni áýletimizben qala syrtyndaǵy «Sabalaq» saıajaıynda qurbandyq shalyp, arýaqtarǵa quran oqytqanbyz. Bala, nemerelerdiń basy qosylǵan soń voleıbol, fýtbol oınap, dýyldasyp jattyq. Basseın jaǵalap júrgen kishkentaılardy kózden tasa qaldyrmaýǵa tyrystyq. Endi qaıtýǵa qam jasap jatqanymyzda jurt shýlap ketti. Sóıtsek, eki jasar sábı eresekterge arnalǵan basseınge túsip ketipti. Sý túbine kete bastaǵan balany kishkentaı nemerem Jansultan alǵash baıqap, jurtty kómekke shaqyra bastaǵanda Aısultan júzip jetip, úrlemeli ballonǵa salyp jaǵaǵa alyp shyǵypty. Jedel qutqarylǵandyqtan, kishkentaı Hantórege medısınalyq kómektiń de qajeti bolmady. Qýanyshtan kózderine jas alǵan ata-anasy Aısultanǵa alǵysyn jaýdyrdy», deıdi Aısultannyń atasy Husaıyn Qorazbaev.
Bir qyzyǵy, Aısultannyń atasy, quqyq qorǵaý salasynyń ardageri Husaıyn Qorazbaev eńbek jolyn tótenshe jaǵdaı salasynda bastapty. О́rt sebepterin anyqtaýshy bolyp bastalǵan qyzmeti keıin polısııada jalǵasty. Balanyń ákesi Ardaq ta qazir kásipkerlik salasyna oıysqan burynǵy polısııa qyzmetkeri.
Toǵyz jasar Aısultan – egizdiń syńary. Baýyry Ersultan da ózimen birge daryndy balalarǵa arnalǵan «Murager» mektebinde oqıdy. Ekeýi de oqý ozaty. Sabaqtan tys ýaqytta «Evrazııa» sport keshenindegi júzý seksııasynan, shahmat klýbynan qalmaıtyn Aısultan jýyrda qalalyq jarysta champion_kzo týrnır qorytyndysy boıynsha 4 sporttyq razrıad normasyn oryndap, 1-oryn ıelendi.
«Jan-jaqty bolyp ósip kele jatqan Aısultan qıyn sátte shuǵyl sheshim qabyldaı alatynyn kórsetti. Tez qımyldap, sábıdiń ómirin qutqaryp qaldy. Men nemeremdi maqtan etemin», deıdi atasy.
Aısultannyń babasy Asan Qorazbaev qan maıdanǵa qatysyp, «Qyzyl Juldyz», «Otan soǵysy» ordenderin ıelengenin aıta ketken jón.
Adam ómirine arasha túsken Aısultan Husaıynnyń erligin oblystyq tótenshe jaǵdaılar departamenti de joǵary baǵalap, erjúrek balaǵa alǵys bildirdi.
QYZYLORDA
