«Petropavlda birde-bir zań buzýshylyq tirkelgen joq»

PETROPAVL. 26 sáýir. Qazaqstanda ótip jatqan saıası  sharalar Reseı tarapynan árkez zor qyzyǵýshylyq tanytyp kele jatqany  belgili. Bul jolǵy prezıdent saılaýyna kórshi eldiń Omby, Túmen jáne Qorǵan oblystarynan  elýge jýyq baıqaýshy qatysyp, saılaý barysyn bastan-aıaq  baqylady.  Bul týraly egemen.kz tilshisi habarlady. Biz  solardyń biri  Mıhaıl Karakozdy   áńgimege  tartyp, alǵan áserlerimen bólisýdi ótingen edik. «Bul – meniń  Qyzyljar óńirine ekinshi saparym. Munyń aldynda  Parlament Májilisi saılaýyna baıqaýshy retinde qatysyp,  kóp tálim alyp qaıtqan  bolatynbyz. Reseıdiń Omby oblysynyń delegasııasyn Omby úkimeti tóraǵasynyń orynbasary Vladımır Kompaneıshıkov bastap keldi.  Delegasııa músheleri  shetinen  tájirıbeli, kásibı bilikti mamandar.  Keń qushaǵyn aıqara ashyp, qonaqjaı peıilmen qarsy alǵan qazaq eline  rızamyz. Endi negizgi taqyrypqa  oıysatyn bolsaq, kezekten tys Prezıdent saılaýyna   jer-jerlerdegi tyńǵylyqty daıyndyǵy, soltústikqazaqstandyqtardyń  kóterińki kóńil-kúımen,  saıası belsendilikpen qarsy alǵany  birden  baıqaldy.  Oǵan saılaý ýchaskelerin aralaý barysynda anyq kóz jetkizdim.  № 635 saılaý ýchaskesinde bolǵanymda  saılaýshylarmen áńgimelesip, pikirlerin surastyrdym. Qaı qaısysyn bolsyn Qazaqstannyń bolashaǵy, erteńgi taǵdyry beıjaı qaldyrmaıdy eken. Báriniń oılary  «aıtýly oqıǵaǵa  óz qalaýymyzben keldik.  О́ıtkeni, Otanymyz – bireý, bizdi ortaqtastyratyn–bir múdde, bir maqsat.  Elimiz kún ótken saıyn gúldenip keledi. Osyndaıda ár daýystyń qanshalyqty mańyzdy ekeni bilinedi.  Sol sebepti qoǵamdyq sanalylyq tanytý – ár qazaqstandyqtyń asyl paryzy» degen paıymdarmen úndesip jatty. Meni osynda 80-nen assa da, taıaǵyna súıenip kelgen  Álpesh degen keıýananyń qaısarlyǵy tań qaldyrdy. Densaýlyǵyn syltaýratyp, úıde daýys beremin dep syltaý tabýǵa bolar edi. Biraq dimkástigine qaramastan kúırektikke salynbaǵan batyr keıpi keremet súısindirdi. Ol maǵan «kelesi  saılaýǵa kelýge de kúsh-qýatym jetedi» dep qaljyńdap qoıady. Odan ári ol № 636, 639, 642, 630 saılaý ýchaskelerindegi  saılaý úderisimen tanysqanda da  demokratııalyq talaptar men zań normalary saqtalýynyń kýási bolǵanyn,  baıqaýshy retinde  saılaý ýchaskelerinde júrgen prezıdentikke úmitkerlerdiń senimdi ókilderi men qoǵamdyq uıym músheleri bura tartýshylyqtardyń kezdespegenin,  ádil de ashyq ótýi qamtamasyz etilgenin jetkizdi. «Qazaqstan – bizdiń ejelgi kórshimiz.  Tósekte basy, tóskeıde  maly qosylǵan tatý elmiz.  Biryńǵaı ekonomıkalyq keńistikke qosylǵaly  ıntegrasııalyq baılanystarymyz tereńdep, naryq kókjıegi keńeıip keledi.  Alys-berisimiz artty. Beıbitshilik pen  kelisimdi nyǵaıtý jolyndaǵy  Qazaqstannyń  umtylysy men álemdik arenadaǵy bedeli joǵary.  О́rkenıetti 30 eldiń qataryna kirý qadamyna  sáttilik tileımin. Men bul pikirlerimdi halyqaralyq baıqaýshylarmen ótken brıfıngte de málimdedim. Bul jolǵy prezıdenttiń saılaý da halyqaralyq qaýymdastyq tarapynan oń baǵa alary daýsyz», - deıdi ol. О́mir Esqalı. Derek, sýret: egemen.kz