Foto: Astana qalasy ákimdigi
«Elordada alǵashqy iri shyǵarmashylyq hab («Mırnyı dom» turǵyn úı kesheninde ornalasqan) ashyldy. «ÓzgeEpic» habyna biregeı etno-mýzeı men qolóner sheberhanasy kiredi. Munda qonaqtarǵa zamanaýı art-performans, mýzykalyq jáne ádebı keshter úshin transformer zal, sondaı-aq zamanaýı óner galereıasy, teatr alańy jáne ulttyq oıyndardyń smart aımaǵy usynylady. Sondaı-aq hab aýmaǵynda otandyq baspalardyń ónimderin satýǵa arnalǵan kitap dúkeni bar», dep jazdy qala ákimi.
Osy tusta Jeńis Qasymbek Astanada alǵash ret ashylǵan kreatıvti habtyń maqsatyn aıqyndady.
«Astanadaǵy kreatıvti habtyń maqsaty – básekege qabiletti zamanaýı ónerdi damytý jáne qoǵamnyń mádenı sanasyn arttyrý, sondaı-aq daryndy jáne ıntellektýaldy jastardy qoldaý ári tálimgerlik etý. Hab shyǵarmashylyq naryqqa júzdegen mamandy qosýǵa yqpal etedi», dep túsindirdi elorda ákimi.
