Tórtjyldyqtyń basty dodasy 26 shilde men 11 tamyz aralyǵynda Parıj qalasynda ótedi. Fransııa astanasynda Qazaqstan quramasy sapynan 80 sportshy sporttyń 25 túrinen baq synap, 81 medal jıyntyǵy boıynsha dodaǵa túsedi. Sportshylarymyz 1991 jyldan beri segizinshi márte jazǵy Olımpıadaǵa qatyspaq.
Saltanatty is-sharada Týrızm jáne sport mınıstri Ermek Marjyqpaev sportshylar jáne jattyqtyrýshylarǵa sáttilik tilep, qalyń jankúıerdiń úmitin aqtaý mańyzdy ekenin aıtty.
«Sizderdiń aldyńyzda elimizdi Parıj Olımpıadasynda tanystyrý, el namysyn abyroımen qorǵaý sııaqty mańyzdy ári óte jaýapty mindet tur. Chempıondyq minez, tabandylyq, jeńiske degen erik-jiger, jıǵan tájirıbe hám jattyqtyrýshylardyń, dárigerlerdiń, massaj jasaýshylardyń qajyrly eńbeginiń arqasynda úlken nátıjege jetetinimizge senimdimin. Táýelsizdik jyldarynda Qazaqstan jazǵy jáne qysqy Olımpııa oıyndarynyń 79 júldesin oljalady. Onyń ishinde 15 Olımpıada chempıony jarqyrap kórindi. Olımpıadadaǵy ár jetistik – búkil eldiń álemdegi ımıdji, memlekettiń ál-aýqatynyń kórsetkishi», dedi E.Marjyqpaev.
Qazaqstan sportshylarynyń arasynda alǵash ret Olımpıada baǵdarlamasyna engen breıkıng jáne badmınton sııaqty sport túrlerinen óner kórsetedi. Breıkıngten Ámir Zakırov saıysqa tússe, badmınton sportynan Dmıtrıı Panarın baq synaıdy. 205 elden 10 myńnan asa sportshy qatysatyn jazǵy Olımpıadanyń saltanaty ashylý is-sharasy Sena ózeninde ótedi.
