Juma kúni erteńgilik jazǵy kanıkýl kezinde demalysta júrgen stýdentter, «Jasyl el» jasaǵy men volonterlik uıym músheleri Shalqar kóliniń jaǵasyna kelip, top-topqa bólinip, tazalaý jumystaryn bastady. Olar qýrap jatqan byltyrǵy qamys-shópterdi tyrmalap, ár jerde úıilgen turmystyq qaldyqtar men demalýshylar tastaǵan qoqystardy jınap, «Úlken Borsyq» orman jáne janýarlar dúnıesin qorǵaý mekemesiniń traktoryna tıedi. Shalqar kóliniń aýmaǵy óte úlken bolǵandyqtan, jastar eń aldymen kópten tazalanbaǵan jaǵalaýyn jınaýdy jón kórdi. «Úlken Borsyq» orman jáne janýarlar dúnıesin qorǵaý mekemesiniń mamandary aksııaǵa qatysýshylarǵa kúrek, tyrma, sypyrǵy, qapshyq, qolǵaptar taratty.
«Bıyl Shalqar aýdany boıynsha «Jasyl el» jasaǵyna 120 jasty qamtý josparlansa, mamyr aıynda 9, maýsymda 33 bala jumys istep ketti. Shilde aıynda jasaqtyń 35 múshesi «Taza qala – taza jaǵalaý», «Bulaq kórseń, kózin ash» aksııalaryna qatysty. Osy jumystar tamyz, qyrkúıek, qazan aılarynda da jalǵasady. Birneshe jas stýdenttik qurylys otrıady sheńberinde «Qolǵanat-Qurylys» jáne «Kvars-spes servıs» JShS-ynda jumys istep jatyr. Aıta ketý kerek, «Taza qala – taza jaǵalaý», «Bulaq kórseń, kózin ash» ekologııalyq aksııalaryna «Jasyl el» jasaǵy múshelerimen birge «Amanat» partııasynyń «Jastar rýhy» jastar qanaty da qosylyp, Shalqar qalasy kóshelerin tazalap, saıabaqtardy retteý men kógaldandyrýǵa qatysty. Máselen, mamyr aıynda balalar «Meniń ataýly aǵashym» atty aksııasy sheńberinde kóshelerge aǵash ekse, maýsymda «Ardagerlerdi ardaqtaıyq», «Taza qala – taza jaǵalaý» aksııasynda belsendilik tanytty», deıdi Shalqar aýdandyq jastar resýrstyq ortalyǵynyń basshysy Aıbek Embergenov.
Aıta ketý kerek, keıingi úsh jyldan beri Shalqar aýdanyndaǵy «Jasyl el» jasaǵy oblysta belsendi, eń bastamashyl, eń tártipti otrıad retinde tanymal bolyp júr. Berilgen mindettemelerdi ýaqtyly ári sapaly oryndap, nátıje kórsetkeni úshin aýdandyq otrıad músheleri ótken jyly óńirdegi «Jasyl el» jasaǵynyń «Jyl serpini» marapatyna qol jetkizdi.
Aqtóbe oblysy
