Ardagerlerge arnalǵan aksııa

Keshe Ortalyq kommýnıkasııalar qyzmetinde bolǵan baspasóz más­lıhatynda Respýblıkalyq «Ardagerler uıymy» qoǵamdyq birlestigi Or­ta­lyq keńesiniń tóraǵasy О́mirzaq Oz­ǵanbaev járdem alýda ardagerlerdiń qolyn uzartatyn «Jeńis» aksııasy bastalǵanyn jarııalady. «Uly Otan soǵysyndaǵy Jeńistiń 70 jyldyǵyna arnalǵan sharalar týraly» degen taqyrypta ótken baspasóz máslıhatyna «Samuryq-Qazyna» ulttyq ál-aýqat qorynyń basqarýshy dırektory Darhan Qaletaev, Eýrazııalyq medıa forýmnyń bas dırektory Rýslan Jemkov, «О́mir joly 24» qoǵamdyq qorynyń dırektory Ernar Nurbekov qatysty. Olar Uly Jeńistiń 70 jyldyǵyna oraı atqarylyp jatqan sharalarǵa toqtalyp, soǵys ardagerlerine jasalatyn qamqorlyqtar jóninde áńgimeledi. «Esterińizde bolsa, «Samuryq-Qazyna» AQ pen Respýblıkalyq «Ardagerler uıymy» qoǵamdyq birlestigi 2015 jyly Uly Otan soǵysyndaǵy Jeńistiń 70 jyldyǵyn toılaý qarsańyndaǵy daıyndyq jumystary aıasynda áriptestik týraly memorandýmǵa qol qoıdy. Qazirgi júzege asyrylyp jatqan ıgi jobalar sonyń jemisi deýge bolady», dedi D.Qaletaev. Basqarýshy dırektor ál-aýqat qorynyń aıtýly sharaǵa oraı bólgen qarajaty týraly da aıtty. «2014 jyly «Samuryq-Qazyna» UOS ardagerlerin qoldaýǵa 130 mln. teńge qarjy bóldi. Bıyl biz bul kómekti eselep arttyrdyq. Sóıtip, onyń kólemi 600 mln. teńgeden asyp tústi. Osy qarjy esebinen ardagerlerge tıisti kómek kórsetilip, júıeli negizde keshendi qoldaý jasalady. О́tkiziletin sharalar jospary «Ardagerler uıymy» ortalyq keńesimen kelisildi. Qor bul baǵdarlamaǵa qatysý úshin seriktesterdi tartyp otyr. Osy oraıda qaıyrymdylyq aksııalaryn ótkizý, aqparattyq Internet-portaldy qurý, sondaı-aq kóp serııaly «Nasha voına» derekti fılmin túsirý jáne basqa da sharalardy uıymdastyrý qarastyrylǵan», dedi ol. Adamzat tarıhynda eń qasiretti bolǵan Ekinshi dúnıe­jú­zilik soǵysqa 60 mıllıonnan astam adam qatysqanyn, onyń 26 mıl­lıonnan astamy KSRO azamat­tary bolǵanyn aıtqan Ardager­ler keńesiniń tóraǵasy, Qazaq­stannan Otandy qorǵaýǵa 1 mıl­lıon 200 myńnan astam adam attanyp, onyń 400 myńnan asta­my maıdannan oralmaǵanyn aıtty. Qazirgi kózi tiri 5 myńǵa jýyq soǵys ardagerlerine memleketpen qatar qoǵamnyń da qamqorlyǵy qajet ekenine nazar aýdartty. «Búgin osy memorandým boıynsha jańa aksııany iske asyrǵaly otyrmyz. Bul aksııany biz «Jeńis» dep atadyq. Osy shara jetpis jyldyqtan keıin de ardagerlerdi qamqorlyqqa alyp, olarǵa qajetti qoldaý kórsetetin uıym bolǵaly tur. Osy aksııa aıasynda ardagerlerge «qaýip-qater dabyly» taratylady. Iаǵnı, úıde jalǵyz qalǵan, qaraýshysy joq ardagerler qıyn jaǵdaıǵa túsken kezde qolyndaǵy bilezikti nemese moınyndaǵy alqa túrindegi qurylǵynyń túımesin bassa, ortalyq dıspetcherlik pýnkt­ke habar túsedi. Habar negizinde bul ardager týraly tolyq aqparat shyǵarylyp, qarttarǵa dereý jedel járdem mashınasy nemese basqa da kómek túrleri barady», dedi О́.Ozǵanbaev. Buıyrtsa, aldaǵy juma kúni­nen bastap bul qurylǵylar qart­tarǵa taratyla bastaıdy. Ar­da­ger­ler sáýir aıynyń aıaǵyna deıin qurylǵylarmen tolyq jabdyq­talyp bolady eken. Desek te, óki­n­ishtisi, elimizde balalary men jaqyn týǵandarynyń qamqor­ly­ǵynsyz, qaraýsyz qalǵan ardagerler de bar eken. Ony tilshiniń qoıǵan suraǵyna oraı, ardagerler uıymy keńesiniń tóraǵasy aıtty. «Baýyr eti balalary men et jaqyn týystary bola turyp, qaraýsyz qalǵan, qarttar úılerin turaq etken ardagerlerimiz bar», dep qorytty ol óz sózin. Nurbaı ELMURATOV, «Egemen Qazaqstan».