Karın Shtrens: bul saılaý jańa jetistikterge ekpin beredi

KО́KShETAÝ. 26 sáýir. Qazaqstanda ótip jatqan prezıdent saılaýynyń barysyna sheteldik baıqaýshylar da óte joǵary baǵa berip otyr. Sonyń naqty deregin biz Kókshetaý qalasyndaǵy saılaý okrýginde júrgen Germanııa býndestagynyń depýtaty Karın Shtrens arqyly baıqadyq. Bul týraly egemen.kz tilshisi habarlady. «Men kórkeıgen Qazaqstanǵa qyzyǵýshylyqpen qaraımyn. Eńseli elge birneshe ret keldim. Ár saparymda jedel ózgeristerge kýá bolyp, qýanyp júremin. Osy Kókshetaýǵa, kórkem Býrabaıǵa da jolym tústi», - dedi ol. «Táýelsiz Qazaqstannyń barlyq salalardaǵy tabysy kóp ultty halyqtyń yntymaq-birliginde, respýblıka basshylyǵynyń salıqaly saıasatynda, bolashaq josparlarynyń baıandylyǵynda dep bilemin. Qazir bul eldiń halyqaralyq qaýymdastyqtaǵy bedeli joǵary. Osy saparymda, janymdaǵy serigim dıplomat Bertold Hans-Frıdrıh fon Pletspen birge halyqaralyq baıqaýshy retinde Kókshetaý qalasyndaǵy №6 jáne №16 saılaý ýchaskelerinde boldym. Jergilikti halyqqa rızamyn. Olar saılaýdyń, ásirese, Prezıdent saılaýyn memlekettik mańyzy bar oqıǵa dep sanaıdy. Eshkim erteńine beı-jaı qaramaıdy. Sondyqtan elektorattyń saıası belsendiligi ósip otyr. Bul bolashaqtyń nurly bolatyndyǵyn kórsetedi», -dep tujyrymdady baıqaýshy. Germanııalyq baıqýshynyń aıtýynsha, Qazaqstanda úlgi alatyn jaılar kóp. Ol sózin: «Biz bul eldiń áli talaı belesterdi baǵyndyratynyna senemiz. Aramyzdaǵy baılanys nyǵaıa berýine tilestespin», - dep aıaqtady. Baqbergen Amalbek. Derek, sýret: egemen.kz .