Elimizde demalys kúnderi aıaz kúsheıedi

ASTANA. 21 qańtar. Qazaqstanda aldaǵy demalys kúnderi úskirik aıazdar kúsheıedi. Bul týraly «Qazgıdromet» ortalyǵy habarlady. Sınoptıkterdiń aıtýynsha, arktıkalyq aýa massalarynda qalyptasqan antısıklonnyń áseri Batys Sibir men Oralǵa ǵana emes, Qazaqstan aýmaǵyna da taralýda. «Jaqyn aradaǵy táýlikte kúnniń sýýy respýblıkanyń batys jáne soltústik-batys aýdandaryn qamtıdy, odan soń barlyq aýmaqqa taralatyn bolady. Antısıklonnyń kúsheıýimen temperatýra tómendeıdi, elimiz soltústiginiń keı jerlerinde aýa temperatýrasy -33-38, kúndizdiń ózinde -20-30 gradýs aıaz bolady dep boljanady», – delingen ortalyq habarlamasynda. Sonymen qatar, ońtústik oblystarda jaqyn aradaǵy úsh táýlik ishinde bultty, qarly aýa-raıy saqtalyp, 24 qańtar kúni túnde -18-23 gradýsqa deıin, keı jerlerde -25-30 gradýs aıazǵa deıin tómendeıdi dep kútilýde. Aıdar О́risbaev. Derek: kazhydromet.kz. Sýret: nur.kz.